اۆستريا كانسلەرى سەباستيان كۋرتس قىزمەتىنەن كەتتى
ول مۇنداي شەشىمدى ەلدە الاساپىران بولماس ءۇشىن جانە تۇراقتىلىقتى قامتاماسىز ەتۋ ءۇشىن قابىلداعانىن ايتتى. سەباستيان كۋرتس ۇكىمەت باسشىسى قىزمەتىنە قازىرگى ەۋروپا جانە شەتەل ىستەرى جونىندەگى مينيستر الەكساندەر شاللەنبەرگتى ۇسىندى.
دەگەنمەن، ول اۆستريا كونسەرۆاتيۆتى حالىق پارتياسىنىڭ كوشباسشىسى بولىپ قالا بەرەدى جانە ونىڭ پارلامەنتتەگى فراكتسياسىن باسقارادى.
ايتا كەتەيىك، بىرنەشە كۇن بۇرىن پارلامەنتتەگى وپپوزيتسيالىق پارتيالار - اۆستريا سوتسيال- دەموكراتيا پارتياسى، ليبەرالدى «جاڭا اۆستريا» جانە اۆستريا بوستاندىق پارتيالارى سەباستيان كۋرتستىڭ قىزمەتتەن كەتۋىن تالاپ ەتكەن بولاتىن. جالپى، جۋىردا اۆستريا پروكۋراتۋراسى كانتسلەرگە جانە تاعى 9 ادامعا قاتىستى تەرگەۋ جۇرگىزىپ جاتقانىن مالىمدەگەن ەدى.
ولار ارتىلعان سەنىمدى اسىرا پايدالاندى جانە كوررۋپتسيا جاسادى دەگەن كۇدىككە ىلىنگەن. تەرگەۋ اقپاراتىنا سەنسەك، ەلدىڭ قارجى مينيسترلىگى 2016-2018 -جىلدار ارالىعىندا بيۋدجەت اقشاسىن گازەت حابارلاندىرۋلارىن قارجىلاندىرۋعا جۇمساعان. ونىڭ ورنىنا سەباستيان كۋرتستىڭ پارتياسىنىڭ ارتىقشىلىعىن كورسەتەتىن قوعامدىق پىكىر ساۋالناماسىن جاريالاعان. بۇل - كۋرتستىڭ بيلىككە كەلۋىنە، كەيىننەن كانسلەر لاۋازىمىنا قول جەتكىزۋىنە ارنالعان جوسپاردىڭ ءبىر بولىگى بولۋى مۇمكىن.
اۆتور: جانات قاپالبايەۆا
