اقمولا وبلىسىندا اققۋدى اتقاندار ۇستالدى

كوكشەتاۋ. قازاقپارات - اقمولا وبلىسىندا قىزىل كىتاپقا ەنگەن اققۋدى اتقان اڭشىلار ۇستالدى، دەپ حابارلايدى قازاقپارات ءتىلشىسى.

اقمولا وبلىستىق پوليتسيا دەپارتامەنتى باسپا ءسوز قىزمەتىنىڭ مالىمەتىنشە، اعىمداعى جىلعى 7- قازاندا ەگىندىكول اۋداندىق پوليتسيا بولىمىنە اۋماقتىق ورمان شارۋاشىلىعىنىڭ قىزمەتكەرى حابارلاسىپ، بەلگىسىز تۇلعالاردىڭ «جۇلدىز» اڭشىلىق شارۋاشىلىعى اۋماعىندا زاڭسىز اڭ اۋلاۋمەن اينالىساتىنىن ايتقان.

«وقيعا ورنىنا جەتكەن پوليتسيا قىزمەتكەرلەرى نۇر- سۇلتان قالاسىنىڭ 41 جانە 42 جاستاعى ەكى تۇرعىنىن انىقتادى. ايتىلعان جەردەن اتىلعان اققۋ، كۇدىكتىلەرگە تىركەلگەن ەكى مىلتىق، سونداي- اق گيلزالار، 60-تان وق- ءدارى، قورامساق تاركىلەندى. تابيعاتقا كەلتىرىلگەن شىعىن كولەمى 5 ميلليون 250 مىڭ تەڭگەنى قۇرايدى»، - دەدى ۆەدومستۆودان.

قازىرگى ۋاقىتتا زاڭسىز اڭ اۋلاۋعا بايلانىستى ەگىندىكول اۋداندىق پوليتسيا ءبولىمىنىڭ تەرگەۋشىلەر قىلمىستىق كودەكستىڭ 337- بابى بويىنشا سوتقا دەيىنگى ءىس تەرگەۋ امالدارىن باستاپ كەتتى. سونىمەن بىرگە، ساراپتاما تاعايىندالدى.

ايتا كەتسەك، وڭىردە سۋدا جۇزەتىن قۇستاردى اۋلاۋعا تىيىم سالىنعان. اققۋلار سيرەك كەزدەسەتىن جانە قۇرىپ كەتۋ قاۋپى تونگەن جانۋارلار تۇرلەرىنىڭ تىزىمىنە جاتادى جانە سانى ازايىپ بارا جاتقان تۇرلەر رەتىندە قازاقستان رەسپۋبليكاسىنىڭ قىزىل كىتابىنا ەنگىزىلگەن.

اۆتور: اسلان وسپانوۆ