اماندىق باتالوۆ كۇرىش القابىن ازايتۋدان تۋىندايتىن پروبلەمانى اتادى

تالدىقورعان. قازاقپارات - الماتى وبلىسىندا يرريگاتسيالىق جۇيەلەردى قالپىنا كەلتىرۋ جۇمىستارىن دامىتۋ بارىسىندا بالقاش اۋدانىنىڭ سۋارۋ جۇيەلەرىن جاڭعىرتۋ جەكە جوبا رەتىندە قاراستىرىلادى، دەپ حابارلايدى قازاقپارات ءتىلشىسى.

اۋدانداعى كۇرىش القاپتارىن سۋاراتىن كانالدار تازارتىلىپ، بۇل داقىلدى وسىرەتىن شارۋاشىلىقتارعا قولداۋ كورسەتىلەدى. ىلە وزەنىنىڭ سۋىن تاراتاتىن باس كانالدى كۇردەلى جوندەۋ ماسەلەسى كۇن تارتىبىنە قويىلادى. بۇل تۋرالى بۇگىن بالقاش اۋدانىنا جۇمىس ساپارىمەن بارعان الماتى وبلىسىنىڭ اكىمى اماندىق باتالوۆ ايتتى.

«كۇرىش سۋدى كوپ قاجەت ەتەدى. ونىڭ القابىن ازايتقاندا جەردىڭ سورى شىعىپ، وعان ەشتەڭە وسپەي قالۋى دا مۇمكىن. سوندىقتان بۇل ىسكە جۇيەلى جوسپار جاساپ بارىپ كىرىسۋ كەرەك. ازىرگە كۇرىشتىڭ القاپتارىن ساقتاپ قالامىز. ول ءۇشىن بالقاش اۋدانىنىڭ سۋارۋ جۇيەلەرىن جاڭعىرتۋدى جەكە جوبا رەتىندە قاراستىرامىز. كۇرىش القاپتارىن سۋاراتىن كانالداردى تازارتۋدى قولعا الامىز. بۇعان دەيىن ءبىز مەليوراتيۆتىك بريگادا قۇرىپ، قاراتال وزەنىنىڭ ارناسىن ارشىپ، ونىڭ بالقاشقا ەركىن قۇيىلۋىنا جاعداي جاساپ، ەلەۋلى جۇمىستار اتقارعانبىز. سوندىقتان بۇل جاعىنان ءبىزدىڭ تاجىريبەمىز بار دەۋگە بولادى. ىلە وزەنىنىڭ سۋىن تاراتاتىن باس كانالدى كۇردەلى جوندەۋ ماسەلەسى كۇن تارتىبىنە قويىلادى. بۇعان دەيىن قاجەتتى تەحنيكالار ساتىپ اپەرىپ، سەرۆيستىك دايىنداۋ ورتالىقتارىن قۇردىق. وسىنداي قولداۋ شارالارى شارۋاشىلىقتارعا بۇدان بىلاي دا كورسەتىلەتىن بولادى»، - دەدى ا. باتالوۆ.

اۆتور: سامال قابىشيەۆا