ە ق ى ۇ ساراپشىسى: پاندەميا كەزىندە كەيبىر زاڭدار اسىعىس قابىلدانىپ جاتتى

نۇر-سۇلتان. قازاقپارات - ەۋروپاداعى قاۋىپسىزدىك جانە ىنتىماقتاستىق ۇيىمىنىڭ دەموكراتيالىق ينستيتۋتتار جانە ادام قۇقىقتارى بيۋروسىنىڭ ساراپشىسى ولا كۋارنستورم پاندەميا كەزىندە زاڭ قالاي قابىلدانۋى كەرەكتىگى تۋرالى پىكىر ءبىلدىردى، دەپ حابارلايدى قازاقپارات ءتىلشىسى.

«پاندەميا كەزىندە كوپتەگەن ەلدەر سوت تورەلىگىن ونلاين رەجيمگە جىبەرىپ، پىكىرتالاستىڭ ءبارىن ونلاين رەجيمدە تىڭداۋ تۋرالى شەشىم قابىلدادى. بۇل كوپ جاعدايدا ناقتى قۇقىقتىق نەگىزدەمەسىز جانە سالدارىن باعالاۋسىز ەنگىزىلدى. جالپى ونلاين قۇرالداردى پايدالانۋ ە ق ى ۇ- عا مۇشە ەلدەردىڭ كوبىنە وتە پايدالى بولعانىن ەستە ساقتاۋىمىز كەرەك. سونىمەن قاتار، ونلاين رەجيمدى سوت وتىرىستارىندا پايدالانۋ ءمىنسىز شەشىم ەمەس ەكەنىن ۇمىتپاۋ كەرەك»، - دەگەن ولا كۋارنستورم، ونلاين پروتسەستەر اسىرەسە ادۆوكاتتاردىڭ ارەكەتىن قاتتى شەكتەگەنىن اتادى.

«كەيدە ادۆوكاتتار كارانتينگە بايلانىستى شەكتەۋلەرگە تاپ بولىپ، كليەنتتەرىمەن كەزدەسە الماي جاتتى. كليەنت پەن ادۆوكاتتىڭ بەينەبايلانىس سويلەسۋى ولاردىڭ اڭگىمەسىنىڭ قۇپيا ساقتالۋىنا قاۋىپ ءتوندىردى»، - دەدى ساراپشى.

سونداي-اق، ول پاندەميا كەزىندە قابىلدانعان زاڭداردىڭ تىم اسىعىس كۇشىنە ەنگەنىن دە اتادى.

«كەيبىر جاڭا زاڭدار اسىعىس قابىلدانىپ جاتتى. سوندىقتان قاراپايىم ازاماتتار ول پروتسەستەردەن حابارسىز بولدى. ەۋروپاداعى قاۋىپسىزدىك جانە ىنتىماقتاستىق ۇيىمىنىڭ دەموكراتيالىق ينستيتۋتتار جانە ادام قۇقىقتارى بيۋروسى پاندەميا كەزىندە زاڭنىڭ وزەكتىلىگىن قامتاماسىز ەتۋ ءۇشىن جاڭا زاڭداردى مۇقيات تالداۋدان كەيىن عانا ەنگىزۋدى ۇسىنادى»، - دەدى ولا كۋارنستورم ونلاين وتىرىس بارىسىندا.

شارا نۇر-سۇلتانداعى ە ق ى ۇ باعدارلامالار وفيسى، قازاقستان رەسپۋبليكاسىنىڭ جوعارعى سوتى جانە قۇقىقتىق ساياساتتى زەرتتەۋ ورتالىعىنىڭ ۇيىمداستىرۋىمەن ءوتتى.