قازاقستاندا ءيت توبەلەستىرۋگە تىيىم سالىنادى
بۇل تۋرالى ق ر ەكولوگيا، گەولوگيا جانە تابيعي رەسۋرستار ۆيتسە-ءمينيسترى ءاليا شالابەكوۆا ماجىلىستە «جانۋارلارعا جاۋاپكەرشىلىكپەن قاراۋ تۋرالى» زاڭ جوباسىن تانىستىرۋ كەزىندە ايتتى، دەپ حابارلايدى قازاقپارات ءتىلشىسى.
«بۇگىن نازارلارىڭىزعا ۇسىنىلعان زاڭ جوباسى جانۋارلارعا قاتىستى كەلەڭسىز كورىنىستەرگە توسقاۋىل قويادى. مۇنداي كورىنىستەرگە، اتاپ ايتقاندا، ءيت ايقاستىرۋ، انەستەزياسىز ۆەتەريناريالىق وپەراتسيالار جۇرگىزۋ، جانۋارلاردى ولتىرگەنى ءۇشىن جازاسىز قالۋ، جانۋارلاردى اش ۇستاۋ جانە ولارعا ۋاقىتىندا كومەك كورسەتپەۋ، قاتىگەزدىكپەن اۋلاۋ، جەۋگە جانە ءونىم الۋعا ارنالماعان جانۋارلاردىڭ ەتى مەن مايىن پايدالانۋ جاتادى»، - دەدى ۆيتسە-مينيستر.
ونىڭ ايتۋىنشا، زاڭ جوباسىنىڭ ەرەجەلەرىن ىسكە اسىرۋ ءۇشىن قولدانىستاعى زاڭناماعا، اتاپ ايتقاندا قىلمىستىق كودەكسكە، اكىمشىلىك قۇقىق بۇزۋشىلىق تۋرالى كودەكسكە، جەرگىلىكتى مەملەكەتتىك باسقارۋ جانە ءوزىن-ءوزى باسقارۋ تۋرالى، ۆەتەريناريا تۋرالى، جانۋارلار دۇنيەسىن قورعاۋ، ءوسىمىن مولايتۋ جانە پايدالانۋ تۋرالى زاڭدارعا وزگەرىستەر مەن تولىقتىرۋلار ەنگىزۋ قاجەت.
«جانۋارلارعا جاۋاپكەرشىلىكپەن قاراۋ تۋرالى» زاڭ جوباسىن قابىلداۋ قازاقستاننىڭ پروگرەسسيۆتى، زاماناۋي مەملەكەت رەتىندەگى ءيميدجىن نىعايتادى، بارلىق تىرشىلىك يەلەرىنە ادامگەرشىلىك پەن ىزگى قارىم-قاتىناستى قالىپتاستىرۋعا، ءۇي جانۋارلارىنا قاتىستى تۇرمىستىق زورلىق-زومبىلىقتىڭ الدىن الۋعا مۇمكىندىك بەرەدى دەپ سانايمىز»، - دەپ تۇيىندەدى ۆيتسە-مينيستر.
