ەلوردالىق وقۋشىلار اسكەري ۇشاقتىڭ تىزگىنىنە وتىردى - فوتو
تانىمدىق شارانى ۇلتتىق ۇلان 3656 اسكەري ءبولىمىنىڭ (اۆياتسيالىق ەسكادريليا) اسكەري قىزمەتشىلەرى تاۋەلسىزدىكتىڭ 30 جىلدىق مەرەيتويى اياسىندا ۇيىمداستىردى.
نەگىزگى قىزمەتتىك- جاۋىنگەرلىك مىندەتتەردەن باسقا ۇلاندىقتار قاراماعىنداعى اسكەري پاتريوتتىق كلۋبتارمەن جانە ورتا ءبىلىم مەكەمەلەرىنىڭ وقۋشىلارىمەن وسىنداي ءىس- شارالاردى ءجيى وتكىزەدى.
اشىق ساباقتى ۇيىمداستىرۋ ءۇشىن اۆياتسيا پاركىنىڭ اۋماعى تاڭدالۋى كەزدەيسوق ەمەس. وعان نۇر- سۇلتان قالاسى №54-مەكتەپ- ليتسەيىنىڭ 7-9-سىنىپ وقۋشىلارى قاتىستى. اشىق ساباقتىڭ نەگىزگى ماقساتى - وسكەلەڭ ۇرپاقتىڭ بويىندا وتانعا دەگەن سۇيىسپەنشىلىك پەن ادالدىق سەزىمىن وياتۋ، ۇلتتىق ۇلاندا قىزمەت ەتۋدى ناسيحاتتاۋ، سونداي-اق اۆياتسيالىق تەحنيكامەن تانىستىرۋ بولدى. ۇلتتىق ۇلان ەسكادريلياسىنىڭ اسكەري قىزمەتشىلەرى وقۋشىلارعا اۆياتسيالىق تەحنيكانى، راديوبايلانىس جۇيەلەرىنىڭ جۇمىسىن، قوزعالتقىشتى، ەلەكتر جابدىقتارىن جانە ۇشاقتار مەن تىكۇشاقتاردىڭ جۇمىس قابىلەتتىلىگىن كورسەتتى.
- جاس ۇرپاق ءۇشىن مۇنداي اشىق ساباقتار - ناعىز مەرەكە. ءبىز اۋەجايدى ارالاپ، اسكەري اۆياتسيالىق تەحنيكانى ءوز كوزىمىزبەن كورە العانىمىزعا قۋانىشتىمىز. مۇنداي شارالار جاستاردى پاتريوتيزم مەن باتىلدىق سياقتى قاسيەتتەردى تاربيەلەۋگە كومەكتەسەدى دەپ ويلايمىن، - دەيدى سىنىپ جەتەكشىسى ساعىنىش رايس قىزى.
مەكتەپ وقۋشىلارى اشىق ساباققا ريزا بولدى، تەك ۇلدار عانا ەمەس، قىزدار دا اسكەري ۇشاقتىڭ ەلەكتروندى جابدىقتارىن باسقارا الدى جانە تىكۇشاقتىڭ تىزگىنىندە وتىردى.
- ايتا كەتۋ كەرەك، ءبىزدىڭ وقۋشىلاردىڭ ۇلتتىق ۇلاننىڭ اسكەري قىزمەتشىلەرىمەن مەكتەپ وقۋشىلارىنىڭ مۇنداي كەزدەسۋلەرى ءبىرىنشى رەت ۇيىمداستىرىلىپ وتىرعان جوق. 3656 اسكەري ءبولىمى مەن 54 مەكتەپ- ليتسەيى اراسىنداعى مەموراندۋمنىڭ جاسالۋى جاس ۇرپاقتىڭ بويىندا ءوزىنىڭ قارۋلى كۇشتەرىمەن ماقتانىش سەزىمىن قالىپتاستىرۋعا مۇمكىندىك بەرەدى، - دەيدى ساباق جەتەكشىسى، 3656 اسكەري ءبولىمى كومانديرىنىڭ تاربيە جانە الەۋمەتتىك - قۇقىقتىق جۇمىستار جونىندەگى ورىنباسارى، پودپولكوۆنيك سەرىك الىمبەكوۆ.
اشىق ساباق سوڭىندا بالالاردىڭ كوپشىلىگى اسكەري ۇشاقتاردىڭ ۇشقىشى بولعىسى كەلەتىنىن ءبىلدىردى، ال ولاردىڭ كەيبىرەۋلەرى كەيىن ءوز ءومىرىن ۇلتتىق ۇلان قاتارىندا وتاندى قورعاۋمەن بايلانىستىرعىسى كەلەتىنىن جەتكىزدى.
