تەلەفونمەن كوڭىل ايتۋ دۇرىس پا؟

نۇر-سۇلتان. قازاقپارات - كوڭىل ايتۋداعى ماقسات - ازالى ادامدى جۇباتۋ جانە سابىرعا شاقىرۋ.

كوڭىل ايتۋ، ءمايىتتى جەرلەۋگە كومەكتەسۋ، مەيىرىم كورسەتۋ كادىمگىدەي ۋايىم- قايعىنى ازايتادى، قازانى شاتتىققا اۋىستىرادى.

پايعامبارىمىز (وعان اللانىڭ سالاۋاتى مەن سالەمى بولسىن):

«كىمدە-كىم قايعىلى ادامعا كوڭىل ايتسا، وعان سول ازاعا بەرىلگەن ساۋاپ مولشەرىندە ساۋاپ بەرىلەدى»، - دەگەن (تيرميزي).

تەلەفون جانە ينتەرنەت ارقىلى اۋىزشا ايتىپ نەمەسە جازباشا تۇردە حابارلاما جىبەرىپ كوڭىل ايتۋعا بولادى. ويتكەنى كوڭىل ايتۋداعى ماقسات - ازالى ادامعا ءوزىنىڭ سەزىمىن، تىلەگىن ءبىلدىرۋ، ونى جۇباتۋ، سابىرعا شاقىرۋ. سونداي-اق ازالى ادامعا ءبىر رەت كوڭىل ايتقان بولسا، وندا ەكىنشى رەت ايتۋدىڭ قاجەتى جوق (ءفاتاۋاي ھينديا، 1/228).

قارالى ادامعا «اللا مارقۇمدى جارىلقاسىن، كۇناسىن كەشىرسىن، مەيىر- شاپاعاتىنا السىن، سونداي-اق سىزگە سابىرلىق جانە سول ارقىلى ساۋاپقا جەتۋدى تىلەيمىن» سياقتى سوزدەرمەن كوڭىل ايتۋ مۇستاحاب سانالادى (ءفاتاۋاي تاتارحانيا، 1/620).

ەڭ جاقسى كوڭىل ايتۋ ۇلگىسى اللا ەلشىسىنىڭ (وعان اللانىڭ سالاۋاتى مەن سالەمى بولسىن) ايتقان مىنا سوزدەرى:

«شىنىندا، العانى دا اللانىكى، بەرگەنى دە ونىكى. ونىڭ قۇزىرىندا ءاربىر نارسەنىڭ اجالى (مەرزىمى) بەلگىلەنگەن» (بۇحاري).

mazhab.kz