ومىرگە باسقا قىرىنان قاراي باستادىم: ۆيرۋستان جازىلعاندار باستان كەشكەنىن ايتىپ بەردى

وسكەمەن. قازاقپارات - ەلىمىزدە كۇن سايىن كوروناۆيرۋس اتتى كەسەلمەن كۇرەستە جەڭىسكە جەتىپ، جازىلىپ شىققاندار بار. ولار ءومىر تاريحىنىڭ وسى ءبىر پاراقتارىن ماڭگى باقي جادىندا ساقتايدى.

«بۇل دەرت ءتىرى جاندىك سياقتى، اعزاڭا كىرىپ سەنى ىشتەن جەيدى. ونى جەڭۋ ءۇشىن ەرىك- جىگەرىڭ مىقتى بولۋى كەرەك»، «جازىلىپ شىققان سوڭ بۇل دۇنيەگە باسقا قىرىنان قاراي باستادىم» دەيدى كوروناۆيرۋسقا شالدىقسا دا بەرىلمەگەن جاندار. وسى ماقالامىزدا سول ءبىر ادامداردىڭ وزگەگە وي سالار اڭگىمەسىن ۇسىنباقپىز.

«سالىڭدى سۋعا كەتىرمە!»

وسكەمەن قالاسىنىڭ تۇرعىنى اسەم قايراتبەك ىندەتتى ەڭسەرىپ شىققانداردىڭ ءبىرى. 3 اپتا بويى ول ۆيرۋسپەن دامىلسىز كۇرەستى.

«دەرتتى قالاي جۇقتىرعانىمدى بىلمەي دە قالدىم. اتى جامان اۋرۋدىڭ قارقىنى قاتتى ەكەن. كەۋدەم قىسىلىپ، دەم جەتپەي، دەنە قىزۋىم 39 گرادۋستان تۇسپەي قويدى. ۇيگە جەدەل جاردەم شاقىرتتىم. پتسر- سىناما ناتيجەسى وڭ بولىپ شىقتى. وسىلايشا، كوروناۆيرۋسپەن كۇرەس باستالدى»، - دەيدى ول. كوپ ۇزاماي تەلەفونىنا egov-تان س م س- حابارلاما كەلىپتى.

وندا «سىزگە COVID-19 ينفەكسياسىنا ءتيىستى ءدارى- دارمەك بوساتىلدى» دەپ جازىلعان. «سول كەزدە «ەندى مىنا دارىلەردى قايدان جانە قالاي الامىن؟» دەگەن ساۋال تۋىندادى. سويتسەم، ول پرەپاراتتاردى ۋچاسكەلىك مەيىربيكە ۇيگە ءوزى اكەلىپ تاستايدى ەكەن. قال- جاعدايىمدى كۇندەلىكتى تەلەفون ارقىلى حابارلاسىپ، ءبىلىپ وتىردى. ەكى كۇندە ءبىر ۇيىمە كەلىپ تەكسەرىپ كەتتى»، - دەيدى اسەم. الايدا 9 كۇن بويى دەنە قىزۋى تۇسپەي قويدى.

وسىلايشا، كومپيۋتەرلىك توموگرافيا (ك ت) جاساتۋ كەرەك بولعان. «الەۋمەتتىك جەلىلەردە دارىگەرلەردىڭ جۇمىسىنا كوڭىلى تولمايتىندىعى جايلى جازىپ جاتقاندار بار عوي. ءبىراق ءوز باسىم اق حالاتتىلاردىڭ جۇيەلى جۇمىسىنا كۋا بولدىم. كت- عا دا اقشا تولەمەدىم. سەبەبى ءمامس جۇيەسىندە ساقتاندىرىلعانمىن. قالاداعى كلينيكالاردىڭ بىرىنە بارىپ، توموگرافياعا ءتۇستىم دە بىردەن سول جەردە ناتيجەسىن الدىم»، - دەپ ەسكە الدى ول.

ايتەۋىر دەگەندە ۆيرۋستىڭ بەتى قايتا باستاعان. تاماققا زاۋقى سوقپاي تابەتى قاشسا دا، سورپا ىشە بەرىپتى. ويتكەنى كوروناۆيرۋسپەن كۇرەسۋ ءۇشىن كۇش كەرەك.

«وسىناۋ دەرتكە شالدىققان ادام قانداي قيىندىق بولسا دا، ونە- بويىن قورقىنىش پەن ۇرەي بيلەسە دە ەشقاشان بەرىلمەي، قارا بۇلتتىڭ ارتىنان كۇن شىعاتىنى سەكىلدى ەرتەڭ جازىلىپ كەتەتىنىنە سەنۋى قاجەت. بۇل ۆيرۋس ءتىرى جاندىك سياقتى، اعزاڭا كىرىپ سەنى ىشتەن جەيدى. سەنىم مەن ەرىك- جىگەر ارقىلى عانا ىندەتتى ەڭسەرۋگە بولادى. ال ەگەر سالىڭدى سۋعا كەتىرىپ، ءۇمىتىڭدى ۇزە باستاساڭ ول سەنى جەڭىپ كەتەدى»، - دەيدى اسەم قايراتبەك.

وسىلايشا، سول سەنىمدى سەرىك ەتكەن ايەل كوروناۆيرۋستان ساۋىعىپ شىققان. قازىرگى ۋاقىتتا كۇيبەڭ تىرلىكتىڭ قام- قارەكەتىنە قايتا ورالسا دا سول ءبىر ۇستارانىڭ ۇشىندا قالعان كۇندەرى كوز الدىنان كەتپەيدى.

«بالام ءۇشىن ۋايىم كەشتىم...»

بوتاكوز كەنجەحانوۆا كوروناۆيرۋسپەن بەتپە بەت كەلگەندە جۇكتىلىكتىڭ 8-شى ايىندا ەدى. دەرتتىڭ سيمپتومدارى پايدا بولعاندا بىردەن ۇيگە جەدەل جاردەم شاقىرتقان. اق حالاتتىلار تەكسەرگەن سوڭ ونى اۋرۋحاناعا الىپ كەتتى.

«كەلەسى كۇنى مەندە كوروناۆيرۋس ينفەكسياسى بار ەكەندىگى انىقتالدى. دارىگەرلەر پالاتاعا جاتقىزىپ، ەم- دوم تاعايىندادى. دەم جەتپەي، سويلەۋگە قينالدىم. كەۋدەم قىسىپ، جاتا المادىم. ونە- بويىم السىرەپ، تاماققا مۇلدە تابەتىم بولمادى. مەديتسينا قىزمەتكەرلەرى كۇندەلىكتى ەكى ۋاقىت سيستەما قويىپ، ۋكول سالىپ وتىردى. وتتەگى كونسەنتراتورىنا دا جاتقىزدى. كۇن سايىن دەنە قىزۋىمدى تەكسەرىپ، قان قىسىمىمدى ولشەدى. قيمىل- قوزعالىسسىز جاتا بەرۋگە بولمايدى ەكەن. سول ءۇشىن جاتتىعۋ جاساپ تۇردىق. قۇرساعىمداعى نارەستەنىڭ جۇرەك سوعىسىن ۇنەمى باقىلاۋدى ۇستادى»، - دەيدى ول.

24 جاستاعى بوتاكوز بالاسى ءۇشىن ۋايىم كەشكەنىن ايتتى. سول ءۇشىن قايتكەن كۇندە دە ىندەتكە بەرىلمەۋگە بەل شەشكەن.

«دەنە قىزۋىم تۇسپەي قويعاندىقتان اق حالاتتىلار كەسار تىلىگى ارقىلى بوساندىرۋ قاجەتتىگىن ايتتى. قۇدايعا شۇكىر، ءبارى ءساتتى ءوتىپ، قىزىم جارىق دۇنيە ەسىگىن اشتى. الايدا ءوزىم كوروناۆيرۋستان جازىلىپ شىققانعا دەيىن ءسابيىمدى باۋىرىما باسا المادىم. ارادا ءبىر اپتا وتكەندە قۇلان-تازا ساۋىعىپ، بالاممەن، وتباسىممەن قاۋىشتىم»، - دەدى ول سول ءبىر قيىن ساتتەر جايلى. قازىرگى ۋاقىتتا بوتاكوز كەنجەحانوۆانىڭ ومىرگە دەگەن كوزقاراسى مۇلدە وزگەرگەن. دەنساۋلىقتىڭ قادىرىن شىن ءتۇسىنىپ، اركەز ساق جۇرەدى.

*** كۇللى الەم حالقىن ابىگەرگە سالعان كوروناۆيرۋستى جەڭگەندەردىڭ ءبىرى، مىنە، وسىلار. ولاردىڭ باسىنا تۇسكەن اۋىرتپالىق وزگەگە وي سالىپ، ساقتىق شارالارىن قاپەردە ۇستاۋ قاجەتتىگىن ەسكەرتەدى دەگەن ويدامىز.

اۆتور: تالعاتجان مۇحامەتبەك ۇلى