كۇرەستەن الەم چەمپيوناتىندا ءجاميلا باقبەرگەنوۆا كۇمىس جۇلدەگەر اتاندى

نۇر- سۇلتان. قازاقپارات - قازاقستاندىق بالۋان ءجاميلا باقبەرگەنوۆا نورۆەگيا استاناسى وسلودا ءوتىپ جاتقان الەم چەمپيوناتىندا كۇمىس جۇلدەگەر اتاندى، دەپ حابارلايدى قازاقپارات ءتىلشىسى.

قازاق قىزدارى اراسىندا تۇڭعىش رەت ايەلدەر كۇرەسىنەن الەم چەمپيوناتىنىڭ فينالىنا شىققان ج. باقبەرگەنوۆا 72 كەلىگە دەيىنگى سالماقتا سوڭعى باسەكەدە جاپونيالىق ماساكو فۋرۋيچيمەن بەلدەستى. بۇعان دەيىن قارسىلاستار ءوزارا ءۇش رەت كەزدەسىپ، سونىڭ ەكەۋىندە جاپونيالىق بالۋان جەڭگەن ەكەن. بۇل جولى تارتىستى باسەكەدە 2019 -جىلعى الەم چەمپيوناتىنىڭ قولا جۇلدەگەرى م. فۋرۋيچي 3:0 ەسەبىمەن الدىرماي كەتتى. وسىلايشا ج. باقبەرگەنوۆا (جەكە باپكەرى قايرات ساعاديەۆ) كۇرەس تۇرلەرىنەن وسلودا ءوتىپ جاتقان الەم بىرىنشىلىگىندە قازاقستان قۇراماسى قورجىنىنا العاشقى جۇلدەنى سالدى.

ەسكە سالا كەتەيىك، بۇدان بۇرىن قازاقستاندىق بالۋان ءجاميلا باقبەرگەنوۆانىڭ الەم چەمپيوناتىنىڭ فينالىنا شىققانىن، يتاليادا قازاقستاندىق دزيۋدوشىنىڭ جاستار اراسىندا الەم چەمپيوناتىنىڭ قولا جۇلدەگەرى اتانعانىن جازعان بولاتىنبىز. سونداي- اق قازاقستاندىق قوس بالۋان قولا جۇلدە ءۇشىن بەلدەسۋگە مۇمكىندىك الدى. وكىنىشكە قاراي، نيلۋفار رايموۆا مەن ديانا كايۋموۆا جۇبانىش بەلدەسۋلەرىندە ۇتىلىپ قالدى.