جىل باسىنان ەلورداعا ۋاقىتشا تۇرۋعا قانشا شەتەلدىك كەلدى
بۇل تۋرالى نۇر- سۇلتان قالالىق پوليتسيا دەپارتامەنتى كوشى- قون قىزمەتى باسقارماسىنىڭ باستىعى ارمان بايمۇحامبەت ايتتى، دەپ حابارلايدى قازاقپارات ءتىلشىسى.
«ەلىمىزگە 30 تاۋلىكتەن كوپ ۋاقىتقا كەلگەن شەتەلدىكتەرگە ۋاقىتشا تۇرۋعا رۇقسات راسىمدەلەدى. جىل باسىنان بەرى مۇنداي 19 مىڭنان استام رۇقسات راسىمدەلدى»، - دەدى ارمان بايمۇحامبەت.
ونىڭ اتاپ وتۋىنشە، ەلىمىزگە كەلگەن شەتەلدىكتەردى قابىلداۋشى تاراپ، ياعني قوناق ۇيلەر، جالعا بەرىلەتىن پاتەرلەر، وقۋ ورىندارى، ەمدەلۋ مەكەمەلەرى، جەكە تۇلعالار ءۇش كۇننىڭ ىشىندە وزگە ەلدىڭ ازاماتىنىڭ كەلگەنى تۋرالى كوشى- قون قىزمەتىنە حابار بەرۋى ءتيىس. بۇل تالاپ بۇزىلعان جاعدايدا قابىلداۋشى تاراپ اكىمشىلىك جاۋاپكەرشىلىككە تارتىلادى.
«ەگەر شەتەلدىك ەلگە كەلۋ مەرزىمىن 10 كۇننەن استام ۋاقىتقا بۇزسا، وندا اكىمشىلىك حاتتاما 25 ايلىق ەسەپتىك كورسەتكىش مولشەرىندە ايىپپۇل شەشىمىمەن سوتقا جىبەرىلەدى نەمەسە قازاقستان اۋماعىنان شىعارىلادى»، - دەپ ءتۇسىندىردى باسقارما باسشىسى.
اۆتور: مارلان جيەمباي
