بيىل قانشا قانداسىمىز قازاقستان ازاماتتىعىن الدى
بۇل تۋرالى نۇر- سۇلتان قالالىق پوليتسيا دەپارتامەنتى كوشى- قون قىزمەتى باسقارماسىنىڭ باستىعى ارمان بايمۇحامبەت ايتتى، دەپ حابارلايدى قازاقپارات ءتىلشىسى.
«جىل باسىنان بەرى قانداستارعا ازاماتتىق بەرۋ مەرزىمى 2 ەسەگە، 6 ايدان 3 ايعا دەيىن قىسقارتىلدى. شامامەن 225 قانداسىمىز جەڭىلدەتىلگەن تارتىپپەن ازاماتتىعىن راسىمدەدى. رەتتەلمەيتىن قۇقىقتىق مارتەبەمەن انىقتالعان 45 تۇلعا قازاقستان ازاماتى دەپ تانىلىپ، قۇجاتتارىن الدى»، - دەدى ارمان بايمۇحامبەت.
سونىمەن قاتار ول ەلىمىزدە ءتولقۇجات پەن جەكە كۋالىك راسىمدەۋ مەرزىمى وڭتايلاندىرىلعانىن اتاپ ءوتتى.
«جەكە باستى كۋالاندىراتىن قۇجاتتاردى راسىمدەۋ تەتىكتەرى دە جەتىلدىرىلىپ جاتىر. وسى جىلدىڭ 9 ايىنىڭ ىشىندە 143 مىڭ ءتولقۇجات پەن جەكە كۋالىك راسىمدەلىپ، بەرىلدى»، - دەدى باسقارما باسشىسى.
اۆتور: مارلان جيەمباي
