ۇلتتىق ۇلان وفيتسەرى ۇشاقتا جاعدايى كۇرت ناشارلاعان ايەلدى امان الىپ قالدى
وسى رەيسپەن جولاۋشى رەتىندە ايەلگە جەدەل كومەك كورسەتكەن ۇلتتىق ۇلان اۋە كەمەسىنىڭ كومانديرى، مايور ستانيسلاۆ سمۋرىگين دە ۇشىپ كەلە جاتقان بولاتىن، دەپ حابارلايدى قازاقپارات ۇلتتىق ۇلاننىڭ باسپا ءسوز قىزمەتىنە سىلتەمە جاساپ.
«تاڭعى ساعات بەس شاماسى كەزى، بارلىعى قالىڭ ۇيقىدا ەدى. ءبىر مەزەتتە ۇشاقتىڭ ىشىندە ابىر- سابىر باستالىپ كەتتى. اۋە سەرىگى ارى-بەرى جۇگىرىپ، جولاۋشىلاردان كومەك سۇراي باستادى. وسى ارادا داۋىس كوتەرگىش قۇرىلعىمەن «مەديتسينا قىزمەتكەرى بار ما؟» دەپ حابار جەتكىزىلدى. ورنىمنان دەرەۋ تۇردىم دا، اۋە سەرىگىنىڭ قاسىنا باردىم. ءوزىمدى تانىستىردىم. مەن دارىگەر ەمەس، اسكەري ۇشقىش ەكەنىمدى جانە العاشقى كومەك كورسەتە الاتىنىمدى ايتتىم. ەڭ الدىمەن قان قىسىمىن ولشەدىم، 80 دە 60 ناتيجەسىن كورسەتتى. سول كەزدە بورتسەرىككە تەزدەتىپ قارا كوفە اكەل دەدىم. قان قىسىمى كوتەرىلدى. سودان سوڭ وتتەگى باللونىن بەرۋدى ءوتىندىم. وعان اۋا قاجەت ەكەنىن ىشتەي ءبىلدىم. وسىلايشا نۇر-سۇلتان قالاسىنا دا جەتتىك. جول بويى ونىڭ ءحالىن سۇراپ، قولىن قىسىپ، سوزبەنەن قولداۋ كورسەتىپ تۇردىم. اۋەجايدا سانيتارلىق بريگادا قىزمەتكەرلەرىنىڭ قولىنا تاپسىردىم»، - دەيدى ۇلاندىق وفيتسەر.
بارلىق قيىندىقتار مەن شەكتەۋلەرگە قاراماستان ۇلتتىق ۇلان وفيتسەرى ەپتىلىك تانىتىپ، بىلگىرلىگىنىڭ ارقاسىندا ايەل ادامعا دەرەۋ كومەك كورسەتىپ، ءتىپتى، ءومىرىن اجالدان اراشالاپ قالعانى شىندىق.
«وسىنداي جاعدايلاردا كومەككە كەلۋ - ءار ازاماتتىڭ بورىشى، اسىرەسە، پوگون تاققاندارعا بۇل پارىز سانالادى. مۇنداي جاعدايعا العاش رەت تاپ بولدىم. جاي كەزدە ءوزىم ۇشاقتى باسقارامىن، وسى جولى جولاۋشى بولا تۇرىپ دارىگەر كەيپىن ەڭسەردىم. كومەك بەرۋ ءۇشىن بار بىلگەنىمدى جاسادىم»، - دەيدى ستانيسلاۆ سمۋرىگين.
وفيتسەر ماماندىعى بويىنشا اسكەري ۇشقىش. ۇلتتىق ۇلان قاتارىندا 2004 -جىلدان باستاپ قىزمەت ەتىپ كەلەدى. كيەۆكە قىزمەتتىك ىسساپارمەن بارعان. اسكەري ۇشاقتى باسقارۋدا تاجىريبەسى مول. بۇگىندە ان-74 اۋە كەمەسىنىڭ كومانديرى بولىپ قىزمەت اتقارادى. اسكەري ۇشاقپەن ەكى مىڭ ساعاتتاي اۋەدە بولعان.
