12:40, 07 - قازان 2021 | GMT +5
قىرعىزستان كوروناۆيرۋستىڭ ءتورتىنشى تولقىنىنا دايىندالىپ جاتىر
بىشكەك. كابار- قازاقپارات - COVID-19 جۇقتىرۋدىڭ انىقتالعان جاعدايلار سانىنىڭ ءوسۋى بايقالادى، بۇل ءتورتىنشى تولقىن باستالعانىن كورسەتۋى مۇمكىن.
بۇل تۋرالى ۇكىمەت ۇيىندە وتكەن بريفينگىدە اۋرۋلاردىڭ الدىن الۋ جانە مەملەكەتتىك سانەپيدقاداعالاۋ دەپارتامەنتى زەرتحانالىق سىناقتار ورتالىعىنىڭ باستىعى ايگۇل جۇماقانوۆا ءمالىم ەتتى، دەپ حابارلايدى قازاقپارات كابار اگەنتتىگىنە سىلتەمە جاساپ.
ونىڭ ايتۋىنشا، جىل سايىن ەلدە قاراشا- جەلتوقسان ايلارىندا تۇماۋ مەن ج ر ۆ ي جۇقتىرۋشىلار سانى ارتادى.
«بۇل كوروناۆيرۋس ينفەكسياسىنىڭ ءتورتىنشى تولقىنىمەن سايكەس كەلۋى مۇمكىن دەگەن بولجامدار بار. ازاماتتاردى قاۋىپسىزدىك شارالارىن ساقتاۋعا جانە بۇقارالىق ءىس-شارالارعا قاتىسۋدان باس تارتۋعا شاقىرامىن»، - دەدى ول. ول سونىمەن قاتار حالىقتى COVID-19 عا قارسى ۆاكسيناتسيادان وتۋگە ۇندەدى.
