اۋعانستان ەكونوميكاسى قۇردىمعا كەتىپ بارادى
تۇرعىندار بانكتەن اپتاسىنا تەك 200 دوللار عانا الا الادى. بۇعان دەيىن بيۋدجەت شىعىنىنىڭ 75 پروتسەنتىن، حالىقارالىق ۇيىمدار جاۋىپ كەلگەن. ەندى ول دا جوق. قىركۇيەك ايىندا جاعدايى ەڭ ناشار دەگەن 10 ميلليون اۋعان ازاماتىنا بەرىلۋگە ءتيىس 606 ميلليون دوللاردىڭ تەك 40 پروتسەنتى عانا اۋدارىلعان. بىرىككەن ۇلتتار ۇيىمىنىڭ مالىمدەۋىنشە، مۇنىڭ سوڭى گۋمانيتارلىق داعدارىسقا اكەلۋى مۇمكىن.
مەري- ەللەن ماكگروارتي، دۇنيەجۇزىلىك ازىق- تۇلىك باعدارلاماسىنىڭ وكىلى:
- اۋعانستاننىڭ ەكونوميكاسى قۇردىمعا كەتىپ بارادى. قىس بولسا كەلىپ قالدى. قازىردەن باستاپ جانارماي باعاسى قىمباتتاپ جاتىر. تۇرعىندار قالاي جۇرەك جالعايمىز، قاقاعان قىستا قايدان جىلۋ تابامىز دەپ سارى ۋايىم جەتەگىندە ءجۇر. مەن بۇل ەلدە گۋمانيتارلىق ميسسيامەن جۇرگەنىمە ءبىراز جىل بولدى. ءبىراق قازىرگىدەي داعدارىستى ءبىرىنشى رەت كورىپ وتىرمىن.
تىعىرىققا تىرەلگەن «تاليبان» ۇكىمەتى ازاماتتارعا ەسكى بيلىكتىڭ اتىنان راسىمدەلگەن بۇرىنعى ۇلگىدەگى ءتولقۇجاتتاردى قايتا بەرە باستادى. ءبىرىنشى كەزەڭدە تۇرعىندارعا 25 مىڭ قۇجات بەرىلمەك. قازىر كۇنىنە 6 مىڭ ءتولقۇجاتتان بەرىلىپ جاتىر. تالىپتەردىڭ مۇنداي شۇعىل قادامعا بارۋىنا مەملەكەتتىك قىزمەتكەرلەردىڭ سوڭعى 3 اي بويى جالاقى الماۋى - باستى سەبەپ. ەندى ولارعا ءتولقۇجات ءۇشىن تولەنگەن اقشادان ايلىق بەرىلمەك.
www.24.kz
