دوسحان جولجاقسىنوۆ «وتان» وردەنىمەن ماراپاتتالدى

نۇر-سۇلتان. قازاقپارات - تانىمال اكتەر، قازاقستاننىڭ حالىق ءارتىسى دوسحان جولجاقسىنوۆ «وتان» وردەنىمەن ماراپاتتالدى. قازاقپارات پرەزيدەنت جارلىعىنىڭ تولىق ءماتىنىن جاريالايدى.

قاۋلى ەتەمىن: 1. ۇلتتىق مادەنيەتتى، كينەماتوگرافيانى جانە تەاتر ونەرىن دامىتۋعا قوسقان ايرىقشا ەڭبەگى ءۇشىن دوسحان قالي ۇلى جولجاقسىنوۆ «وتان» وردەنىمەن ناگرادتالسىن.

2. وسى جارلىق قول قويىلعان كۇنىنەن باستاپ قولدانىسقا ەنگىزىلەدى.

ايتا كەتەيىك، دوسحان جولجاقسىنوۆ بۇگىن 70 جاسقا تولدى . اكتەر تەاتر ساحناسىندا جانە كينودا 200 دەن استام ءرولدى سومداعان. سونىمەن قاتار حالىق اندەرى مەن قازىرگى قازاق كومپوزيتورلارى اندەرىن شەبەر ورىنداۋشى رەتىندە كەڭىنەن تانىمال. جولجاقسىنوۆ ۇلتتىق كينو ونەرىنىڭ دامۋىنا ءوز ۇلەسىن قوسىپ، «گاۋھارتاس»، «دالاداعى قۋعىن»، «التىن كۇز»، «ومپا»، «اق بارىستىڭ ۇرپاقتارى»، «كوشپەندىلەر»، «ءبىرجان سال» جانە باسقا فيلمدەرگە تۇسكەن.