دارىگەرلەرگە كوروناۆيرۋس ۇستەمەقىسىن تولەۋ نەگە توقتاتىلدى؟
بۇل سۇراققا ق ر دەنساۋلىق ساقتاۋ ءمينيسترى الەكسەي سوي جاۋاپ بەردى، دەپ حابارلايدى قازاقپارات ءتىلشىسى.
«ءسىز COVID-19-بەن بايلانىستى ۇستەمە تولەمدەردى الىپ تاستاۋ ەرتە قابىلدانعان شارا دەپ سانامايسىز با؟ ويتكەنى ستاتسيوناردا ەم الىپ جاتقانداردىڭ سانى ءالى ازايا قويعان جوق قوي» - دەپ سۇرادى جۋرناليست و ك ق وتكەن باسپا ءسوز ءماسليحاتىندا.
«قوسىمشا تولەمدەر تۋرالى شەشىم ينفەكسيانىڭ باستاپقى كەزەڭىندە مۇلدەم تۇسىنىكسىز بولعان كەزدە قابىلداندى. نەگىزىنەن بۇل ەلدەگى توتەنشە جاعداي جاريالانعان كەزدە قابىلداندى. بۇل كەزەڭ بىلتىر ءوتتى. ءبىراق بۇعان قاراماستان، مەملەكەت تولەم مەرزىمىن ۇزارتىپ وتىردى. بىزدە سول كەزدە جەكە قورعانىس قۇرالدارى جەتىسپەدى، ءدارى-دارمەكتەر تاپشى بولدى، جاڭا جابدىقتارمەن، اۋرۋحانالارمەن، اۋانى تازارتۋ جۇيەلەرىمەن پروبلەمالار بولدى. وسىنىڭ ءبارىن ءبىز سالدىق. وڭىرلەردە جەدەل جاردەم قىزمەتىن جابدىقتاپ، ءدارى-دارمەكتەرگە قاجەتتىلىكتى تولىق قامتاماسىز ەتتى. ەڭ باستىسى - ءبىز بارلىق مەديتسينا قىزمەتكەرلەرىن ۆاكسينالادىق. ولاردىڭ 99 پايىزى ۆاكسينالانعان. ياعني، قازىر ولار قورعالعان. مەديتسينا قىزمەتكەرلەرىنىڭ قانداي دا ءبىر قورعانىس مۇمكىندىگى بار. ول كەزدە ەشقانداي مۇمكىندىك بولمادى جانە ۆاكسينا بولمادى. بۇل تەڭدەسى جوق قولداۋ. ءبىراق مەملەكەت باسشىسى مەملەكەتتىڭ مۇمكىندىكتەرى ءتۇپسىز ەمەس ەكەنىن جانە ىنتالاندىرۋدىڭ وزگە دە تاسىلدەرى قاجەت ەكەنىن اتاپ ءوتتى»، - دەپ ءتۇسىندىردى مينيستر.
ول، سونداي-اق، دارىگەرلەردىڭ جالاقىسى پاندەميا ءورشىپ تۇرعان كەزدەگىدەي بولماعانىمەن، قازىرگى مولشەرى تۇراقتى اقتالاتىنىن اتادى.
«اگرەسسيۆتى جاعدايدا جۇمىس ىستەيتىن بارلىق مەديتسينا قىزمەتكەرلەرى قوسىمشا اقى الادى. ولاردىڭ ايلىعى سالادا ءبىزدىڭ ارىپتەستەرىمىزگە قاراعاندا جوعارى بولادى. بەلگىلى ءبىر كوەففيتسيەنتتەر بولادى. بىزدە قالىپتاسقان تاسىلدەر بار. ماسەلەن، بولاشاقتا مەديتسينا قىزمەتكەرلەرىنىڭ جالاقىسى 2,5 ەسەگە ارتادى. دارىگەرلەردىڭ جالاقىسىنىڭ جالپى دەڭگەيى ورتاشا ەسەپپەن 500 مىڭعا جەتەدى. بۇل كەزەڭ-كەزەڭىمەن جۇرگىزىلەدى جانە جىل سايىن ءبىز جالاقىنى %30 دان كوتەرەمىز»، - دەدى الەكسەي سوي.
ۆەدومستۆو باسشىسى دارىگەرلەردىڭ جالاقىسىن ۋاقتىلى يندەكستەۋ ۇسىنىلاتىنىن اتادى.
«ياعني، قاۋىپتى ايماقتاردا جۇمىس ىستەيتىن دارىگەرلەر بىزدە وسى سالادا جۇمىس ىستەيتىن دارىگەرلەردىڭ ورتاشا جالاقىسىنان جوعارى بولادى. بۇل تۇراقتى شارا. ءبىز قازىر ءبىر جىل بۇرىنعىدان گورى ۆيرۋسپەن كۇرەسكە دايىنبىز، جاڭا كادرلاردى دايىندادىق»، - دەدى دەنساۋلىق ساقتاۋ ءمينيسترى.
