كوروناۆيرۋستى انىقتاۋدا پ ت ر- تەستكە نەلىكتەن باسىمدىق بەرىلەدى - مينيستر جاۋابى

نۇر-سۇلتان. قازاقپارات - ق ر دەنساۋلىق ساقتاۋ ءمينيسترى الەكسەي سوي كوروناۆيرۋستى انىقتاۋ ىسىندە پ ت ر- تەستكە نەگە باسىمدى بەرىلىپ وتىرعانىن ءتۇسىندىردى، دەپ حابارلايدى قازاقپارات ءتىلشىسى.

«قازاقستاندا كوروناۆيرۋستى انىقتاۋعا ارنالعان ەكسپرەسس-تەستەردىڭ بىرنەشە ءتۇرى تىركەلگەن. كەيبىر كوممەرتسيالىق كومپانيالار وسى تەستەردى پايدالانىپ ءجۇر. بۇل جەردە ماسەلە مىنادا. دۇنيەجۇزىلىك دەنساۋلىق ساقتاۋ ۇيىمى اۋرۋ جۇقتىرعانداردىڭ رەسمي ساتيستيكاسىن جۇرگىزۋ ءۇشىن ءبىرىڭعاي ءتاسىل رەتىندە پ ت ر- تەستى قولدانادى. سوندىقتان، الەمدە قولدانىلاتىن «التىن ستاندارت» پ ت ر - تەست بولىپ تۇر»، - دەگەن ۆەدومستۆو باسشىسى، پ ت ر- گە بالاما انتيگەندەر، ي ف ا- تەستەر قازاقستاندا دا تىركەلگەنىن اتاپ ءوتتى.

«ونداي تەستەردىڭ بىرنەشە ءتۇرى قولدانىلىپ جاتىر. قالاسا، پايدالانۋعا بولادى. قازىر كەيبىر پ ت ر- تەست جۇرگىزۋ قيىن جەرلەردە وسىنداي ەكسپرەسس-تەستەردى ەلدىڭ ىشىندە دە قولدانۋ ماسەلەسى پىسىقتالىپ جاتىر. ول تەستەردى وندىرۋشىلەر ساپاسى مەن تيىمدىلىگى 90 پايىزدان كەم ەمەس دەپ كورسەتەدى. ءبىراق قالاي بولعاندا دا كوروناۆيرۋس ينفەكسياسىنىڭ اقتىق دياگنوزى پ ت ر - تەست قورىتىندىسىنان كەيىن عانا مويىندالادى»، - دەگەن مينيستر، ەكسپەرسس-تەستى اركىم ءوز بەتىمەن پايدالانا المايتىنىن ەسكەرتتى.

«بۇل تەستەردى قولدانىپ جۇرگەن ۇيىمدار ەركىن ساتىپ وتىر. ءبىراق ونى اركىم ءوز بەتىمەن پايدالانا الادى دەگەن ءسوز ەمەس. ول تەستەردى الۋدىڭ بەلگىلى ءبىر پروتسەدۋراسى بار. كەيبىرى قان تامشىسىن قولدانسا، كەيبىرى مۇرىن شىرىشىن الادى. ياعني، ماماندار عانا ىستەۋى ءتيىس ادىستەرى بار. بۇل تەست قورىتىندىسىنىڭ ساپاسى بۇلىنبەۋ ءۇشىن كەرەك»، - دەدى الەكسەي سوي.