ۆاكسينا الماعان بالالار مەكتەپكە كىرۋدەن شەكتەلە مە - مينيسترلىك جاۋابى

نۇر- سۇلتان. قازاقپارات - ق ر دەنساۋلىق ساقتاۋ ءبىرىنشى ۆيتسە- ءمينيسترى مارات شورانوۆ بالالاردى ۆاكسيناعا مىندەتتەۋدىڭ ىقتيمالدىعى تۋرالى پىكىر ءبىلدىردى، دەپ حابارلايدى قازاقپارات ءتىلشىسى.

Рfizer ۆاكسيناسى كەلسە، ەكپە الماعان بالالار مەكتەپكە كىرۋدەن شەكتەلە مە؟ ورتالىق كوممۋنكاتسيالار قىزمەتىندە وتكەن بريفينگىدە ب ا ق وكىلدەرى دەنساۋلىق ساقتاۋ مينيسترلىگىنىڭ باسشىلارىنا وسىنداي ساۋال قويدى.

«جالپى قازىرگى تاڭدا كوروناۆيرۋسقا قارسى ەكپەنى 18 جاستان باستاپ جاساپ جاتىرمىز. Рfizer ۆاكسيناسى كەلگەننەن كەيىن 12 جاستان باستاپ پايدالانۋعا بولادى. قازىرگى كەزدە ۆاكسينا الماعان بالالاردى شەكتەۋ كوزدەلىپ وتىرعان جوق. ول ءار بالانىڭ اتا- اناسىنىڭ كەلىسىمى بويىنشا، ەرىكتى تۇردە عانا سالىنادى. سوندىقتان ءبىز ءوز تارابىمىزدان ءتۇسىندىرۋ جۇمىستارىن حالىققا جەتكىزەمىز»، - دەگەن ۆيسە- ءمينيسترى مارات شورانوۆ جاقىندا Рfizer ۆاكسيناسىنىڭ 4 ميللوننان استام دوزاسى ەلگە جەتكىزىلەتىنىن اتادى.

«بۇل ماسەلە بىزدە وتە ەرەكشە دەپ ەسەپتەيمىز. نەگە دەسەڭىز، ءبىز بالالاردىڭ ءبىلىم الۋىن وفلاين رەجيمگە كوشىردىك. سانيتارلىق رەجيم، ماسكا رەجيمى دەيمىز، سونىڭ ارقاسىندا قازىر بالالاردىڭ اراسىندا ناۋقاستانۋ كورسەتكىشى ۇلكەن ەمەس - 0,6 پايىز بولىپ وتىر. سوندىقتان دا ۆاكسينا كەلگەنىمەن بالالارىمىز مەكتەپكە قورىقپاي بارا الادى دەپ سەنەمىز»، - دەدى مارات شورانوۆ.

ق ر دەنساۋلىق ساقتاۋ ءمينيسترى الەكسەي سوي Рfizer ۆاكسيناسىن ەلگە اكەلۋ بويىنشا اتقارىلىپ جاتقان جۇمىستار بارىسىن ايتتى.

«Рfizer بويىنشا اقتىق كەلىسىمشارتقا قول قويدىق. Рfizer كومپانياسىندا كەلىسىمنىڭ بىرنەشە پروتسەسى بار. اقتىق كەلىسىمشارت بويىنشا شامامەن 4 ميلليون دوزا جەتكىزۋ جوسپارلانىپ وتىر. كۇتىپ وتىرمىز. مەنىڭ ويىمشا، جۋىقتا - ءتورتىنشى توقساندا الۋمىز كەرەك. تيىسىنشە توڭازىتۋ جۇيەسى تولىقتاي تۇزىلەدى. جەتكىزۋ كەزەڭىنىڭ وزىندە قازاقستاننىڭ ءار وڭىرىندە توڭازىتۋ جۇيەسى بولادى. ول قاجەتتى -80 گرادۋستىق رەجيمگە ساي بولعانى كەرەك. سوندىقتان، قاجەت جايدايدىڭ ءبارى جاسالادى»، - دەگەن ۆەدومستۆو باسشىسى، ۆاكسينالاۋ بەكەتتەرىندە قازىردىڭ وزىندە ۆاكسينا ساقتاۋعا بارىنشا جاعداي جاسالعانىن ەسكە سالدى.

ونىڭ ايتۋىنشا، Рfizer ۆاكسيناسىن ساقتاۋدىڭ ءتاسىلى قولدانىستاعى تاسىلمەن ۇقساس. «پرينتسيپى ۇقساس، تەك ساقتاۋ تەمپەراتۋراسىنىڭ رەجيمى عانا وزگەشە. سوندىقتان وڭىرلەردىڭ بارىندە قوسىمشا قوندىرعىلار ورناتىلادى. مەنىڭ ويىمشا، ۆاكسينا كەلگەن كەزگە دەيىن توڭازىتۋ جەلىسى باسقا ۆاكسينالارعا دا جارامدى بولادى. بۇل كەلەشەكتە دە ۆاكسينالاردى بىرنەشە تەمپەراتۋرا رەجيمىندە كۇتىپ ۇستاۋدىڭ كوپساتىلى مەحانيزمىن قالىپتاستىرۋعا جول اشادى. قازىر الەمدە جاسالىپ جاتقان كەز كەلگەن ۆاكسينانى ساقتاۋدىڭ مۇمكىندىگى پايدا بولادى»، - دەدى مينيستر.

اۆتور: ەسىمجان ناقتىباي