اسكەرگە شاقىرىلعاندار اراسىندا كوزى ناشار كورەتىندەر كوبەيگەن - امانتاي وسەربايەۆ
الماتىدا ونلاين بريفينگ بارىسىندا الماتى قالاسى قورعانىس ىستەرى جونىندەگى دەپارتامەنتىنىڭ باسشىسى امانتاي وسەربايەۆ وسىلاي دەپ مالىمدەدى.
«بۇگىندە كەلىسىمشارت بويىنشا قىزمەت ەتكىسى كەلەتىندەر سانى ارتىپ كەلەدى. مىسالى، بيىل كەلىسىمشارتپەن جۇمىس ىستەۋگە الماتىدان 500-گە جۋىق ادام قابىلداندى»، - دەدى ول.
سونىمەن قاتار، اسكەرگە شاقىرىلعاندار اراسىندا كورۋ قابىلەتى ناشار ازاماتتار كوبەيگەن.
«جاڭا بۋىنداعى اسكەرگە شاقىرىلۋشىلار اراسىندا ءجيى كەزدەسەتىن اۋرۋلاردىڭ ءبىرى - كورۋ قابىلەتىنىڭ ناشارلىعى، سوندىقتان تالاپتار وزگەرىپ، تومەندەتىلدى. سەبەبى، قازىر % 100 كورۋ قابىلەتى بار اسكەرگە شاقىرىلۋشىلار از. ءبىز سونداي- اق ۇمىتكەرلەردىڭ ءبىلىم دەڭگەيى مەن پسيحولوگيالىق جاعدايىن ەسكەرەمىز»، - دەدى ا. وسەربايەۆ.
بريفينگ بارىسىندا قورعانىس ىستەرى جونىندەگى دەپارتامەنت باسشىسى اسكەرگە شاقىرۋدى كەيىنگە قالدىرۋ نەمەسە بوساتۋ تۋرالى شەشىمدى تەك شاقىرۋ كوميسسياسى قابىلدايتىنىن ايتتى.
اۆتور: دۋمان ارعىنگەلدى
