ماڭعىستاۋدا بيىل تۇرىك ينۆەستورلارىنىڭ قاتىسۋىمەن ءىرى ەكى جوبا ىسكە قوسىلادى

اقتاۋ. قازاقپارات - ماڭعىستاۋدا جىل سوڭىنا دەيىن تۇرىك ينۆەستورلارىنىڭ قاتىسۋىمەن ءىرى ەكى جوبا ىسكە قوسىلادى، دەپ حابارلايدى قازاقپارات ءتىلشىسى.

بۇل تۋرالى وبلىس اكىمى نۇرلان نوعايەۆتىڭ تۇركيانىڭ اقتاۋ قالاسىنداعى باس كونسۋلى مۇزاففەر اقىلدىرىمدى قابىلداۋىندا بەلگىلى بولدى.

كەزدەسۋ بارىسىندا ماڭعىستاۋ وبلىسى مەن تۇركيا اراسىنداعى ەكونوميكالىق بايلانىستاردى ودان ءارى نىعايتۋ ماسەلەلەرى، ينۆەستيتسيالىق مۇمكىندىكتەر مەن ءوڭىرارالىق كاسىپكەرلىكتى دامىتۋ پەرسپەكتيۆالارى تالقىلاندى. تۇركيا ءوڭىردىڭ سىرتقى ساۋدا بايلانىستارىندا ماڭىزدى ءرول اتقارادى. وسى جىلدىڭ قاڭتار- تامىز ارالىعىندا وبلىس پەن تۇركيا ساۋدا اينالىمى 93,1 ميلليون دوللاردى قۇرادى. ونىڭ ىشىندە ەكسپورت - 52,4 ميلليون دوللار.

ايتا كەتسەك، ماڭعىستاۋ وبلىسىنىڭ اۋماعىندا تۇرىك كاپيتالىنىڭ قاتىسۋىمەن ەكونوميكانىڭ ءتۇرلى سالالارىندا 86 كاسىپورىن تىركەلگەن. سونداي- اق، وسى جىلدىڭ سوڭىنا دەيىن اقتاۋ ىرگەسىندەگى «جىلى جاعاجاي» اۋماعىندا ينۆەستيتسيالىق قۇنى 100 ميلليارد تەڭگە بولاتىن 2 جوبانى ىسكە قوسۋ جوسپارلانىپ وتىر.

«ساۋدا قالاشىعى» مەن «گولف- كلۋب» دەمالىس كەشەنىنىڭ اشىلۋى 200 ادامدى تۇراقتى جۇمىسپەن قامتۋعا مۇمكىندىك بەرەدى. وبلىس اكىمى جەرگىلىكتى اتقارۋشى ورگان وكىلدەرى ەكى ەل اراسىنداعى ىسكەرلىك بايلانىستى ودان ءارى دامىتۋ ءۇشىن بارىنشا جۇمىس ىستەيتىنىن جەتكىزدى. تۇركيانىڭ اقتاۋ قالاسىنداعى باس كونسۋلى دا ءوز كەزەگىندە جەمىستى ارىپتەستىكتى ارى قاراي جالعاستىرۋعا دايىن ەكەنىن ايتتى.

اۆتور: قاراكوز مارات