ەۋروپا وداعى ورتالىق ازيا ءۇشىن ماڭىزدى ستراتەگيا قابىلدادى - ەرجان قازىحان

الماتى. قازاقپارات – ق ر پرەزيدەنتىنىڭ حالىقارالىق ىنتىماقتاستىق جونىندەگى ارناۋلى وكىلى ەرجان قازىحان «ورتالىق ازيا - ەۋروپالىق وداق» ازاماتتىق فورۋمىنىڭ ماڭىزى تۋرالى ايتتى، دەپ حابارلايدى قازاقپارات ءتىلشىسى.

ونىڭ ايتۋىنشا، فورۋم ازاماتتىق قوعامدى دامىتۋ جانە ادام قۇقىقتارىن قورعاۋ سالاسىندا بەلسەندى جۇمىس جۇرگىزۋگە نەگىزدەلگەن.

«بۇگىنگى فورۋم - وتە ماڭىزدى. بۇل - ورتالىق ازيادا ءوتىپ جاتقان ءۇشىنشى فورۋم. ءبىرىنشىسى قىرعىزستاندا، ەكىنشىسى وزبەكستاندا ءوتتى. ەۋروپالىق وداق ورتالىق ازيا ءۇشىن ماڭىزدى ستراتەگيانى قابىلدادى. بۇل ستراتەگيالاردىڭ نەگىزگى تارماقتارىنىڭ ءبىرى - ازاماتتىق قوعامدى نىعايتۋ جانە ازاماتتىق قوعامنىڭ ءرولى. بۇگىندە قازاقستاندا مەملەكەتتىك ورگاندار مەن ازاماتتىق قوعام اراسىنداعى ديالوگتى نىعايتۋعا جانە كەڭەيتۋگە ۇلكەن كوڭىل ءبولىنىپ جاتىر»، - دەدى ق ر پرەزيدەنتىنىڭ حالىقارالىق ىنتىماقتاستىق جونىندەگى ارناۋلى وكىلى ەرجان قازىحان.

سونىمەن قاتار، ول ءۇش تاقىرىپتىق سەسسيا الەۋمەتتىك ينتەگراتسيا ارقىلى تۇراقتىلىقتى ارتتىرۋعا، ايەلدەر مەن جاستاردىڭ ءال- اۋقاتىن دامىتۋعا جانە وڭىرلىك ىنتىماقتاستىق- ەكولوگيالىق پروبلەمالاردى بىرلەسىپ شەشۋ ماسەلەلەرىنە ارنالعانىن تىلگە تيەك ەتتى.

«فورۋم كوروناۆيرۋستىڭ جاھاندىق جاعىمسىز سالدارىمەن كۇرەس جانە ازاماتتىق سەكتوردى قوسا العاندا، بارلىق مۇددەلى تاراپتاردىڭ كۇش- جىگەرىن بىرىكتىرۋ اياسىندا ەرەكشە وزەكتى بولا ءتۇستى»، - دەيدى ول.

ايتا كەتەيىك، الماتىدا «ورتالىق ازيا - ەۋروپالىق وداق» ازاماتتىق فورۋمى ءوتىپ جاتىر. شاراعا ورتالىق ازيانىڭ بەس مەملەكەتى مەن ەۋروپالىق وداقتىڭ دەلەگاتسياسى قاتىسىپ جاتىر.

اۆتور: الما مۇقانوۆا