قىتايلىق ارحەولوگتار تيبەتتە ەجەلگى جارتاس سۋرەتتەرى مەن تاس قۇرالدارىن تاپتى - فوتو

بەيجىڭ. قازاقپارات - قىتايلىق ارحەولوگتار تيبەتتەگى نامتسو كولىنىڭ ماڭىندا ارحەولوگيالىق زەرتتەۋ ميسسياسى بارىسىندا ەجەلگى جارتاس سۋرەتتەرى مەن تاس قۇرالدارىن تاپتى.

بۇل تۋرالى «جەنمين جيباو» باسىلىمى قىتاي ورتالىق تەليەۆيدەنيەسىنە (CCTV) سىلتەمە جاساپ حابارلايدى.

مالىمەتتەر بويىنشا، عىلىمي ەكسپەديتسيا بيىل تامىز ايىندا باستالعان. عىلىمي ەكسپەديتسيا توبى نامتسو كولى مەن ونىڭ توڭىرەگىندە ۇڭگىردەگى جارتاس سۋرەتتەرىنە، سونداي - اق تيبەتتىڭ سولتۇستىگىندەگى ءشول دالادا جارتاسقا قاشالعان سۋرەتتەرگە كەشەندى جانە جۇيەلى زەرتتەۋ جۇرگىزدى. قىتايلىق ارحەولوگتار تيبەتتىڭ سولتۇستىگىندە تاس قۇرالدار، تاس قابىرلەر مەن قۇرباندىق جادىگەرلەرى سياقتى كوپتەگەن كونە مادەني ارتەفاكتىلەر مەن تاريحي ورىنداردى تاپتى. ونىڭ ىشىندە تەك نامتسو كولىنىڭ ورتالىعىنداعى زاشي ارالىندا عانا ارحەولوگتار 53 جەردەن جارتاس سۋرەتتەرىن انىقتاعان.

ارحەولوگتار زاشي ارالىنداعى ۇڭگىرلەردىڭ بويالعان جارتاس سۋرەتتەرى نەگىزىنەن مينەرالدى پيگمەنتتەردەن جاسالعانىن ايتادى. ءتۇسىنىڭ كوپ بولىگى قىزىل، ءبىراق از مولشەردە قارا ءتۇس تە كەزدەسەدى.

سۋرەتتەر نەگىزىنەن اڭشىلىق، مال باعۋ، قۇرباندىق شالۋ، جەكپە-جەك، جەرلەۋ، قۇدايعا تابىنۋ ت. ب. بەينەلەيدى.

عىلىمي زەرتتەۋ كەزىندە تابىلعان ەڭ ۇلكەن جارتاستاعى سۋرەتتىڭ بيىكتىگى 65 س م، ەنى 48 س م، وندا ادامنىڭ بەتى بەينەلەنگەن. بۇل قازىرگى ۋاقىتتا تيبەتتە تابىلعان ەڭ ۇلكەن سۋرەت. ارحەولوگتار بۇل سۋرەتتەر شامامەن 1800 جىل بۇرىن سالىنعان بولۋى مۇمكىن دەپ بولجايدى. عىلىمي زەرتتەۋلەر سولتۇستىك تيبەت ءۇستىرتىن مەكەندەگەن كوشپەلى حالىقتار باسقا ەتنيكالىق توپتارمەن بايلانىسقا تۇسكەنىن دالەلدەيدى، دەيدى عالىمدار.

اۆتور: مۇحتار مۇرات