الەمدە ەنەرگەتيكالىق داعدارىس قاۋىپكە اينالدى
جانارماي باعاسىنىڭ قۇبىلۋى دا تالاي ەلدى، تۇتاس ايماقتاردى تىعىرىققا تىرەمەك. Bloomberg ساراپشىلارى، قازىردەن وسىلاي دەپ دابىل قاعىپ وتىر.
ماماندار الەم تازا ەنەرگياعا كوشەر الدىندا ەنەرگەتيكالىق داعدارىسپەن العاش رەت بەتپە- بەت كەلىپ وتىر جانە بۇل سوڭعىسى ەمەس دەپ بولجايدى. ەۋرووداقتىڭ 5 ەلى گاز باعاسىنىڭ رەكوردتى دەڭگەيدە كوتەرىلۋىنىڭ سەبەبىن تەرگەۋگە كىرىستى. بۇل تۋرالى فرانسيا، يسپانيا، چەحيا، رۋمىنيا جانە گرەكيانىڭ ەكونوميكا جانە قارجى مينيسترلەرى بىرلەسكەن مالىمدەمە جاسادى. ولار سونداي- اق كوگىلدىر وتىن قورى بويىنشا ورتاق ەرەجە جاساۋدى ۇسىندى.
ۋرسۋلا فون دەر ليايەن، ەۋروكوميسسيا پرەزيدەنتى:
- ستراتەگيالىق ماقسات بولعاندىقتان، گاز قورىن ەۋروپالىق كەڭەستە تالقىلاۋىمىز قاجەت دەپ ويلايمىن. ءبىز كوگىلدىر وتىنعا قاتتى تاۋەلدىمىز. ونىڭ 90 پروتسەنتى سىرتتان تاسىمالدانادى. مۇنايدىڭ 97 پروتسەنتىن دە يمپورتتايمىز. سوندىقتان جەتكىزۋشىلەرگە وتە جوعارى دەڭگەيدە كىرىپتارمىز.
الداعى ورتا جانە ۇزاق مەرزىمدى جوسپاردا ەۋروپالىق جاسىل ەنەرگيا كەلىسىمشارتىنا سەنىم ارتقانىمىز ابزال بولادى. بۇل باعىتتا ءبىز تاۋەلسىز بولامىز، باعا دا تۇراقتى ساقتالادى.
