اقمولا وبلىسىندا «اۋىل - ەل بەسىگى» جوباسى قالاي جۇزەگە اسىرىلۋدا

كوكشەتاۋ. قازاقپارات - اۋىل تۇرعىندارىنىڭ ءومىر ءسۇرۋ دەڭگەيىن ارتتىرۋ ءۇشىن ەلىمىزدە «اۋىل - ەل بەسىگى» ارنايى جوباسى ىسكە اسىرىلۋدا.

ونىڭ نەگىزگى مىندەتتەرى - اۋىلدىق اۋماقتاردىڭ الەۋمەتتىك جانە ينجەنەرلىك ينفراقۇرىلىمىن جاڭعىرتۋ، ولاردى وڭىرلىك ستاندارتتار جۇيەسىنىڭ پارامەترلەرىنە كەلتىرۋ. اقمولا وبلىسىندا جوبانى ءتيىمدى ىلگەرىلەتۋ ماقساتىندا 2025 -جىلعا دەيىنگى جەكە جوسپار- كەستەسى ازىرلەندى.

بۇل قۇجات ءارتۇرلى جوبالار ىسكە اسىرىلاتىن اۋىلدىق ەلدى مەكەندەر بويىنشا مالىمەتتەردى قامتيدى، دەپ حابارلايدى قازاقپارات ءتىلشىسى وبلىستىق ىشكى ساياسات باسقارماسىنا سىلتەمە جاساپ.

وبلىستىڭ ەكونوميكا جانە بيۋدجەتتىك جوسپارلاۋ باسقارماسىنىڭ دەرەگى بويىنشا، 2019-2020 -جىلدارى وڭىردە 72 جوبا ىسكە اسىرىلدى. بۇل، 15 اۋىلدىڭ 80 مىڭعا جۋىق تۇرعىنىنىڭ ءومىر ءسۇرۋ ساپاسىن جاقسارتۋعا مۇمكىندىك بەردى. باعدارلاما شەڭبەرىندە جالپى ۇزىندىعى 120 شاقىرىم كەنتىشىلىك جولدار جوندەلدى، زەرەندى جانە بۇلاندى اۋداندارىنىڭ ۆيكتوروۆكا اۋىلدارىنىڭ ەكى مىڭنان استام تۇرعىنى ساپالى ورتالىقتاندىرىلعان سۋعا قول جەتكىزدى، استراحانكا اۋىلىندا ينجەنەرلىك جەلىلەرى بار قازاندىق، ارشالى كەنتىندە 88 ادام قابىلدايتىن باسسەينى بار دەنە شىنىقتىرۋ- ساۋىقتىرۋ كەشەنى سالىندى، جىلۋمەن جابدىقتاۋ جەلىلەرىنە، كوشەنى جارىقتاندىرۋعا جانە باسقا دا كوپتەگەن وبەكتىلەرگە جوندەۋ جۇرگىزىلدى. 844 ۋاقىتشا جۇمىس ورنى قۇرىلدى، ونىڭ 48 ءى تۇراقتى جۇمىس ورنى.

«بيىل ەل تاۋەلسىزدىگىنىڭ مەرەيتويلىق جىلىندا 27 اۋىلدا 77 جوبانى ىسكە اسىرۋعا بيۋدجەت قاراجاتى ءبولىندى. وتكەن جىلدارمەن سالىستىرعاندا بولىنگەن قاراجات كولەمى ۇلعايدى، قارجىلاندىرىلاتىن جوبالار مەن اۋىلدىق ەلدى مەكەندەردىڭ سانى ءوستى. بۇگىنگى تاڭدا 14 جوبا بويىنشا جۇمىستار اياقتالدى. بۇل كراسنويار اۋىلىن جىلۋمەن جابدىقتاۋدىڭ سىرتقى جەلىلەرىن سالۋ، مادەنيەت، ەگىندىكول اۋىلدارىنداعى جولداردى ورتاشا جوندەۋ، جاقسى، لوزوۆوە اۋىلدارىنداعى مادەنيەت ءۇيىن كۇردەلى جوندەۋ جانە جولداردى ورتاشا جوندەۋ، نوۆوسەلوۆكا اۋىلىنداعى كوشە- جول جەلىلەرىن ورتاشا جوندەۋ»، - دەدى ۆەدومستۆودان.

اتباسار اۋدانىنىڭ باستاۋ اۋىلىندا جاستاردىڭ بوس ۋاقىتىن وتكىزۋ ورتالىعىنىڭ، جاقسى جانە اقمول اۋىلدارىندا ەكى دەنە شىنىقتىرۋ- ساۋىقتىرۋ كەشەنىنىڭ، بۋراباي اۋدانىنىڭ مادەنيەت اۋىلىندا سپورت كەشەنىنىڭ قۇرىلىسى، ساندىقتاۋ اۋدانىنىڭ بالكاشينو اۋىلىنداعى ستاديوندى جانە باسقا دا نىسانداردى قايتا جاڭارتۋ جۇرگىزىلۋدە. وتكىزىلىپ جاتقان ءىس- شارالار اۋىلدىق اۋماقتاردى دامىتۋعا جاڭا سەرپىن بەرىپ، جالپى ەل ەكونوميكاسىنا وڭ اسەرىن تيگىزەدى.