قاراعاندى وبلىسىندا «ەلەكتروندى باقتاشى» پايدا بولادى

قاراعاندى. قازاقپارات - قاراعاندى وبلىسىنىڭ جاڭاارقا اۋدانىندا «ەلەكتروندى باقتاشى» جۇيەسى ەنگىزىلەدى.

بۇل جانۋارلاردىڭ قاتىسۋىمەن بولاتىن جازاتايىم وقيعالاردى ازايتۋعا كومەكتەسەدى، دەپ حابارلايدى قازاقپارات ءتىلشىسى.

پيلوتتىق جوبا تۋرالى ونلاين رەجيمدە وتكەن قۇقىق بۇزۋشىلىقتاردىڭ الدىن الۋ جونىندەگى ۆەدومستۆوارالىق كوميسسيانىڭ وتىرىسىندا ايتىلدى.

سۇراقتاردىڭ باسىم بولىگى جول قاۋىپسىزدىگىنە قاتىستى بولدى. كوبىنەسە اپاتتار جانۋارلاردىڭ جولعا شىعۋىنا بايلانىستى بولاتىنى ايتىلدى.

رەسپۋبليكالىق تراسسالاردا تورلى قورشاۋلار ورناتۋ جالعاسۋدا. سونداي-اق، جايىلىمداردى قاۋىپسىز جوعارى كەرنەۋلى سىممەن قورشاۋ تۋرالى شەشىم قابىلداندى.

رەسپۋبليكالىق ماڭىزى بار جول وتەتىن ەلدى مەكەندەردە جاياۋ جۇرگىنشىلەر وتكەلدەرىن پروجەكتورلارمەن جارىقتاندىرۋ جوسپارلانعان. جول بەلگىلەرىن جول بولىگىنە پروەكتسيالاۋ جۇيەسى تۇنگى ۋاقىتتا «زەبرانى» قاۋىپسىز ەتەدى دەپ كۇتىلۋدە.

قاراعاندىدا 2022-جىلى 18 جىلعا جۋىق جۇمىس ىستەپ تۇرعان باعدارشامداردى باسقارۋ جۇيەسىن اۋىستىرا باستاۋ جوسپارلانۋدا. قاراعاندى-تەمىرتاۋ جولى قوسىمشا جارىقتاندىرىلادى.

شامداردى ورناتۋ ماسەلەسى مەردىگەردىڭ جوقتىعىنان تۋىندادى. وسى كەزەڭدە جارىق جابدىقتارىنىڭ ءبىر بولىگى ىستەن شىقتى. قازىر شامداردىڭ %50 قالپىنا كەلتىرىلدى، قالعاندارىن جاقىن ارادا رەتكە كەلتىرۋ كوزدەلىپ وتىر. پوليتسيا دەپارتامەنتىنىڭ باستىعى ەرلان فايزۋلليننىڭ ايتۋىنشا، جول قوزعالىسى ەرەجەلەرىن بۇزۋدى اۆتوماتتى تۇردە تىركەۋگە ارنالعان جاڭا اپپاراتتىق-باعدارلامالىق كەشەندەر ءوز تيىمدىلىگىن كورسەتتى.

ولار 1- قازاندا وبلىستىڭ بەس قالاسىندا ورناتىلدى. ءتورت كۇن ىشىندە 14 مىڭنان استام قۇقىق بۇزۋشىلىق تىركەلدى. وبلىس اكىمى جەڭىس قاسىمبەك بەينەباقىلاۋ كامەرالارىن قوسىمشا قارجىلاندىرۋدى قاراستىرۋدى تاپسىردى.

ءوڭىر باسشىسى بۇل قادام اۆتوكولىك جۇرگىزۋشىلەرىن تارتىپكە كەلتىرەتىنىن اتاپ ءوتتى.