تەلەفونعا ۇزاق قاراساڭىز

نۇر-سۇلتان. قازاقپارات - قازىرگى كەزدە كەز كەلگەن ادامنان «قاي زاتسىز ءبىر كۇن بولسىن جۇرە المايسىڭ؟» دەپ سۇراساڭىز، كوبى ۇيالى تەلەفونىن تاڭدايدى.

جاڭا تەحنولوگيالار ارقاسىندا تەلەفون تانىستارىڭمەن بايلانىساتىن قۇرال عانا ەمەس: ونى ويىن ويناۋعا، فيلم كورۋگە، وقۋعا جانە ساۋدا جاساۋعا پايدالانامىز. سوندىقتان ۇيالى تەلەفوننىڭ ەكرانىنا قاراۋمەن كوپ ۋاقىت ءوتىپ كەتەدى. ال ساراپشىلار بولسا، ادامداردىڭ سمارتفون الدىندا ۇزاق وتىرۋىنىڭ جاعىمسىز سالدارلارى جايلى ءجيى ەسكەرتەدى.

كوزگە كۇش تۇسەدى

«ساندىق قۇرالداردى ۇزاق قولدانۋ كوزگە كوپ كۇش تۇسىرەدى، — دەيدى امەريكالىق وپتومەتريا اكادەمياسىنىڭ مۇشەسى، دارىگەر حوۆارد پەرسەلل. — ونىڭ بەلگىلەرى مىناداي بولۋى مۇمكىن: ناشار كورۋ، زەيىن قويا الماۋ، قىزارۋ، كوزدىڭ شارشاۋى نەمەسە قۇرعاقتىق، باس اۋىرۋى».

ەگەر ۇيالى تەلەفون ەكرانىنىڭ الدىندا ۇزاق وتىرۋ كەرەك بولسا، دارىگەر حوۆارد 20/20/20 ەرەجەسىن قولدانۋدى ۇسىنادى. ول ءۇشىن ءار 20 مينۋت سايىن شامامەن 6 مەتر (20 فۋت) قاشىقتىقتا تۇرعان ءبىر زاتقا 20 سەكۋند بويى قاراۋ كەرەك.

مويىن اۋىرادى

ادام ۇيالى تەلەفونعا قاراعاندا باسىن تومەن سالبىراتىپ، ارقاسىن بۇكىرەيتىپ وتىرادى. دارىگەرلەردىڭ ايتۋىنشا، سمارتفونداردى بەلسەندى قولدانۋشىلاردا ءجيى كەزدەسەتىن پروبلەما — مويىننىڭ سوزىلۋى.

وتتەگى جەتپەيدى

كليۆلەند كلينيكاسىنىڭ مالىمەتى بويىنشا، بۇكىرەيىپ وتىرۋ وكپەنىڭ كەڭەيۋىنە كەدەرگى كەلتىرەدى، سوندىقتان ونىڭ كولەمى ازايادى. وتتەگىنى از جۇتۋ جۇرەگىڭىزدى كوبىرەك جۇمىس ىستەۋگە يتەرمەلەيدى.

بىلەك سوزىلادى

سمارتفوندى قولدا ۇزاق ۇستاعاندىقتان بىلەك كانالى قىسىلادى جانە ءسىڭىر بايلانىستارى قابىنادى.

باس بارماق اۋىرادى

«ماتىندىك» باس بارماق — تەلەفونمەن ۇزاق وتىراتىن ادامداردىڭ اراسىندا ءجيى كەزدەسەتىن تاعى ءبىر كەڭ تاراعان جاراقات. ۇنەمى ءماتىن تەرگەندىكتەن باس بارماقتىڭ اۋىرۋى نەمەسە ۇيىپ قالۋى مۇمكىن.

ۇيقى بۇزىلادى

ۇيالى تەلەفونعا ۇزاق قاراپ وتىرۋ اعزاداعى مەلاتونين دەڭگەيىنە اسەر ەتىپ، ونى ازايتادى. وعان قوسا تەلەفون ەكرانىنىڭ اشىق ءتۇسى ميدى بەلسەندى تۇردە ۇستاپ تۇرادى.

مازا كەتەدى

ادامدار كوپ ۋاقىتتى شىنايى ومىردەن گورى «كيبەر الەمگە» جۇمسايتىن بولعاندىقتان مازاسىز اۋىتقۋلار مولشەرى كوبەيىپ جاتىر. پسيحولوگتاردىڭ ايتۋىنشا، ادامدار ساناسىن قورقىنىشتى جاڭالىقتارمەن جانە «ءمىنسىز ينستاگرام ومىرىمەن» تولتىرىپ، قورعانسىز بولىپ بارا جاتىر.

دەپرەسسياعا ۇشىرايدى

تەلەفونعا تاۋەلدى بولۋ ادامنىڭ ءوزىن-ءوزى باعالاۋىنا كەرى اسەرىن بەرەدى. ادام الەۋمەتتىك جەلىلەردەن باسقا ادامداردىڭ ادەمى سۋرەتتەرىن كورىپ، ولاردى ەرىكسىز وزىمەن سالىستىرا باستايدى. بۇل سالىستىرۋ دەپرەسسياعا اكەلەدى.

ەلەستەيدى

ەگەر تەلەفونىڭىزدىڭ حابارلاماسىنىڭ داۋسىن نەمەسە ۆيبراتسياسىن ەستىپ، ءبىراق ونى قاراعاندا ەشقانداي حابارلاما مەن حات بولماسا، ءسىز جالعىز ەمەسسىز. ءسىز ەستەن ايىرىلعان جوقسىز، بۇل گالليۋتسيناتسياعا ۇقسايتىن جاڭا قۇبىلىس. پسيحولوگتار وعان «فانتومدىق ۆيبراتسيا سيندرومى» دەگەن اتاۋ بەردى. سوڭعى جۇرگىزىلگەن زەرتتەۋلەر بويىنشا، ونىمەن سمارتفوندى بەلسەندى قولداناتىنداردىڭ شامامەن %10 قينالادى.

massaget.kz