پارا العان ەلوردالىق پوليتسەيلەرگە سوت ۇكىمى شىعارىلدى
ەلوردانىڭ ەسىل اۋداندىق 2№ سوتى نۇر-سۇلتان قالالىق پوليتسيا دەپارتامەنتى جول-پاترۋلدىك پوليتسياسى مامانداندىرىلعان باتالونىنىڭ 2 ينسپەكتورىنا قاتىستى ايىپتاۋ ۇكىمىن شىعاردى.
اتالعان سوتتىڭ مالىمەتىنە سايكەس، ينسپەكتورلار ت. مەن س. وسى جىلدىڭ 12- ناۋرىزىندا گاز جابدىعىنا رۇقساتسىز قايتا جابدىقتالعان كولىكتى باسقارعان ازامات ا. -دان اكىمشىلىك جاۋاپكەرشىلىككە تارتپاۋ ءۇشىن 5000 تەڭگە پارا العان.
سوتتالۋشىلاردىڭ كىناسى قىلمىستىق ءىس ماتەريالدارىمەن دالەلدەنىپ وتىر. ال ق ر ق ك- ءنىڭ 366-بابى 3-بولىگىنىڭ 2-تارماعىندا پارا العانى ءۇشىن پارا كولەمىنىڭ 60 تان 70 ەسەلەنگەن سوماسىنا دەيىن ايىپپۇل سالۋ، نە 7 جىلدان 12 جىلعا دەيىنگى مەرزىمگە باس بوستاندىعىنان ايىرۋ تۇرىندەگى جازا كوزدەلگەن.
پروكۋرور پارا سوماسىنىڭ 70 ەسەلەنگەن مولشەرىندە ايىپپۇل تۇرىندە جازا تاعايىنداۋدى سۇراعان.
«سوت جازانى جەڭىلدەتەتىن ءمان-جاي رەتىندە سوتتالۋشىلاردىڭ جاس بالالارىنىڭ بار ەكەنىن، شىن جۇرەكتەن وكىنۋىن ەسكەردى. ال قابىلدانعان انتتى بۇزۋدى جاۋاپتىلىقتى اۋىرلاتاتىن ءمان-جاي دەپ تاپتى. ولارعا پارانىڭ 70 ەسەلەنگەن سوماسى مولشەرىندە، ياعني 350 مىڭ تەڭگە سوماسىندا ەڭ جوعارى ايىپپۇل تۇرىندەگى جازا تاعايىندالدى. ت. مەن س. ءومىر بويىنا مەملەكەتتىك قىزمەتتى اتقارۋ قۇقىعىنان ايىرىلدى. ۇكىم زاڭدى كۇشىنە ەنگەن جوق»، - دەپ اتاپ وتەدى اۋداندىق سوتتىڭ باسپا ءسوز قىزمەتىنەن.
