دىندەر كوشباسشىلارىنىڭ سەزى: جۇمىس توبى العاشقى وتىرىسىن وتكىزدى
جۇمىس توبىنىڭ وتىرىسىنا الەمدىك جانە ءداستۇرلى دىندەر كوشباسشىلارى سەزىنىڭ ماقساتتارى مەن مىندەتتەرىن ىلگەرىلەتۋ جونىندەگى ۋاكىل، ن. نازاربايەۆ ورتالىعىنداعى «كونفەسسياارالىق جانە وركەنيەتارالىق ديالوگتى دامىتۋ ورتالىعى» ك ە ا ق باسقارما ءتوراعاسى بولات سارسەنبايەۆ باسشىلىق ەتتى.
«جۇمىس توبىنىڭ وتىرىسى - حاتشىلىقتىڭ جۇمىس ورگانى. مۇندا 14 ادام قاتىسۋدا. بۇگىن ءبىز حاتشىلىقتىڭ كۇن ءتارتىبىن تالقىلايمىز. نەگىزىنەن الەمدىك جانە ءداستۇرلى ءدىن كوشباسشىلارىنىڭ جەتىنشى سەزىنە دايىندىق بويىنشا قانداي جۇمىستار جۇرگىزىلىپ جاتقانىن تالقىلايمىز. بەلگىلى ءبىر كريتەريلەر، قۇجاتتار، سەزد وتكىزۋ ۋاقىتى مەن كۇنى تالقىلانادى. بۇگىن ۇسىنىمدار جاسالىپ، تۇپكىلىكتى شەشىم ەرتەڭ الەمدىك جانە ءداستۇرلى دىندەر كوشباسشىلارى سەزى حاتشىلىعىنىڭ باسشىسى، ق ر پارلامەنتى سەناتىنىڭ ءتوراعاسى ماۋلەن اشىمبايەۆ باسقاراتىن حاتشىلىقتا قابىلداناتىن بولادى»، - دەدى ب. سارسەنبايەۆ تىلشىلەرگە بەرگەن سۇحباتىندا.
الەمدىك جانە ءداستۇرلى دىندەر كوشباسشىلارى سەزى حاتشىلىعىنىڭ جۇمىس توبى وتىرىسىنا ساۋد ارابياسى، ۇلى بريتانيا، ءۇندىستان، پاكىستان، يران، ب ا ءا، ۆاتيكان، يزرايل، كورەيادان 11 وكىل قاتىستى.
«سەزد حاتشىلىعىندا 20 ەل ۇسىنىلعان. وعان ءدىن كوشباسشىلارى، ءدىني بىرلەستىكتەردىڭ جەتەكشىلەرى، دىنتانۋمەن بايلانىستى ينستيتۋتتار مەن ۋنيۆەرسيتەتتەردىڭ باسشىلارى قاتىسادى. سونداي-اق، الماتىداعى نۇر-مۇباراك قازاق-ەگيپەت ۋنيۆەرسيتەتىنىڭ رەكتورى، دوكتور مۇحاممەد اش-شاححات ءال-دجيندي دە بار. ءبىز بارلىق ماسەلەلەردى تالقىلايمىز، شەشىم قابىلدايمىز جانە ۇسىنىمدار رەتىندە ەرتەڭ حاتشىلىق قاتىسۋشىلارىنا ۇسىنىلاتىن بولادى»، - دەپ اتاپ ءوتتى بولات سارسەنبايەۆ.
