وسكەمەندە قايتا اشىلعان اۋەجايدان قاي قالالارعا قاتىناۋعا بولادى

وسكەمەن. قازاقپارات - وسكەمەندە بيىلعى قازان ايىندا ءوز جۇمىسىن قايتا باستاعان اۋەجايدان قاي قالالارعا ۇشۋعا بولاتىندىعى بەلگىلى بولدى، دەپ حابارلايدى قازاقپارات ءتىلشىسى.

وسكەمەن قالاسىنداعى اۋەجايدا اۋقىمدى رەكونسترۋكسيالاۋ جۇمىستارى وسىدان 5 اي بۇرىن باستالعان. قازىرگى تاڭدا ۇشىپ- قونۋ جولاعىن 2500 مەتردەن 2800-گە دەيىن ۇزارتۋ جانە يكاو I ساناتىنا سايكەس زاماناۋي جارىق- سيگنالدىق جابدىقتى ورناتۋ بويىنشا جۇمىستار اياقتالدى.

«قازاقستاننىڭ اۆياتسيالىق اكىمشىلىگى اۋەجايدى پايدالانۋعا رۇقسات بەردى. ءسويتىپ، وسى قازان ايىنان باستاپ اۋەجاي قايتا اشىلدى. جوبادا رۋلدەۋ جولدارىن، پەرروندى، تۇراقتى جانە پەريمەتر بويىنشا كۇزەتتىك جارىقتاندىرۋ جانە بەينەباقىلاۋ ورىندارىن رەكونسترۋكسيالاۋ، جۇك تەرمينالىن، ۋاقىتشا ساقتاۋ قويماسى مەن گاراج سالۋ كوزدەلگەن. جوبا جىل سوڭىنا دەيىن اياقتالادى دەپ جوسپارلانىپ وتىر»، - دەپ حابارلادى ق ر يندۋستريا جانە ينفراقۇرىلىمدىق دامۋ مينيسترلىگىنەن.

بۇگىندە اۋەجايدان:

- نۇر- سۇلتان قالاسىنا (ەير استانا - اپتاسىنا 7 رەيس، سكات - اپتاسىنا 4 رەيس، Qazaq Air - اپتاسىنا 2 رەيس)؛

- الماتى شاھارىنا (ەير استانا - اپتاسىنا 7 رەيس، سكات - اپتاسىنا 7 رەيس، Qazaq Air - اپتاسىنا 4 رەيس)؛

- قاراعاندى قالاسىنا (Qazaq Air - اپتاسىنا 2 رەيس) ۇشۋعا بولادى.

سونىمەن قاتار 7 - قازاننان باستاپ زايسان قالاسىنا (اپتاسىنا 2 رەت) رەيس قايتا جاندانادى.

ەسكە سالايىق، وسىعان دەيىن وسكەمەندە جاڭارتىلعان اۋەجايدىڭ قايتا اشىلعانىن حابارلاعان بولاتىنبىز.

اۆتور: تالعاتجان مۇحامەتبەك ۇلى