قىلمىستىق توپ باحرەينگە كامەلەتكە تولماعان قىزداردى دا جىبەرىپ وتىرعان – ءى ءى م
«بيىلعى 9 ايدا ىشكى ادام ساۋداسىنا قاتىستى 200 قىلمىستىق ءىس بولدى. ونىڭ ىشىندە 78- ءى سوتقا جولداندى. قالعاندارى بويىنشا تەرگەۋ جالعاسىپ جاتىر. 26 ادامعا قاتىستى ءارتۇرلى جازانى تاعايىنداي وتىرىپ، ايىپتاۋ ۇكىمى شىعارىلدى» ، - دەگەن تەرگەۋ دەپارتامەنتىنىڭ باستىعى سوڭعى ءۇش جىلدا جىل سايىن ادام ساۋداسىنىڭ 90 قۇربانى انىقتالعانىن اتادى. «ونىڭ 20 سى ءماجبۇرلى ەڭبەككە تارتىلعان»، - دەدى ول ورتالىق كوممۋنيكاتسيالار قىزمەتىندە وتكەن بريفينگىدە. ءى ءى م وكىلىنىڭ سوزىنە قاراعاندا، «ادام ەكسپورتى» ازياداعى 6 ەلگە باعىتتالىپ وتىرعان.
«بۇل رەتتە كاتار، يندونەزيا، باحرەين، بىرىككەن اراب امىرلىكتەرى، تۇركيا جانە وڭتۇستىك كورەيادا پايدالانۋ ماقساتىن كوزدەيتىن سەگىز ارنا، سونداي- اق وزبەكستان مەن قىرعىزستاننان ادام اكەلەتىن ەكى يمپورت ءدالىزى جويىلدى. مىسالى، بيىل ءبىز قازاقستان رەسپۋبليكاسىنىڭ، رەسەي فەدەراتسياسىنىڭ جانە باحرەين كورولدىگىنىڭ ازاماتتارىنان قۇرالعان 19 ادامدىق ترانسۇلتتىق ۇيىمداسقان توپقا قاتىستى تەرگەۋدى اياقتادىق. باحرەينگە جىنىستىق قاناۋ ءۇشىن تارتىلعانداردىڭ اراسىندا كامەلەتكە تولماعاندار دا بار. زارداپ شەككەندەردىڭ جالپى سانى 39 عا جەتتى. قازىرگى ۋاقىتتا قىلمىستىق ءىس سوتتا قارالىپ جاتىر»، - دەدى سانجار ءادىلوۆ.
