بۇگىننەن باستاپ بالا تۋعاندا بەرىلەتىن جاردەماقىنى رەسىمدەيتىن جاڭا سەرۆيس ىسكە قوسىلدى
بالا تۋعاندا بەرىلەتىن جاردەماقىنى رەسىمدەيتىن جاڭا سەرۆيس بۇگىننەن، ياعني 5-قازاننان باستاپ قولجەتىمدى. جوبانى ەڭبەك جانە حالىقتى الەۋمەتتىك قورعاۋ مينيسترلىگى، ادىلەت مينيسترلىگى جانە تسيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى بىرلەسىپ ىسكە اسىرۋدا. ەكىنشى دەڭگەيدەگى بانكتەردىڭ موبيلدى قوسىمشالارى ارقىلى مەملەكەتتىك قىزمەتتەردى الۋدىڭ ىڭعايلى تۇسى سول، مۇنداي پروتسەسس كەزىندە جەكە ە س ق- كىلتتەردى پايدالانۋدىڭ جانە قوسىمشا اقپاراتتى ەنگىزۋدىڭ قاجەتى جوق.
پيلوتتىق جوباعا Kaspi Bank پەن Halyk Bank قاتىسۋدا. جاردەماقى نەمەسە الەۋمەتتىك تولەم تاعايىنداۋدى رەسىمدەۋ ءۇشىن وسى بانكتەردىڭ ءبىرىنىڭ موبيلدى قوسىمشاسىندا مەملەكەتتىك قىزمەت كورسەتۋ بويىنشا ءبولىمدى تاۋىپ، ءتيىستى مەملەكەتتىك قىزمەتتى تاڭداپ، دەربەس دەرەكتەردى وڭدەۋگە كەلىسىمدى راستاۋ قاجەت.
ءوتىنىمدى جىبەرگەننەن جانە ونى مەملەكەتتىك ورگان تاراپىنان قاراعاننان كەيىن كورسەتىلەتىن قىزمەتتى الۋشىعا ونى قاراۋ ناتيجەسى جانە تاعايىندالعان تولەم سوماسى تۋرالى PUSH- حابارلاما جانە SMS جىبەرىلەدى.
«بۇل جوبا كەلەسى توعىز ايدا جۇزەگە اسىرىلادى. وڭ ديناميكا مەن سۇرانىس بولسا، سونداي- اق ەكىنشى دەڭگەيدەگى بانكتەر تەحنيكالىق جاعىنان دايىن بولسا، جوبا پيلوتتىق فورماتتان قولدانىستاعى فورماتقا كوشىرىلەدى دەپ جوسپارلانۋدا. ءوز كەزەگىندە، مەملەكەتتىك ورگاندار باسقا ەكىنشى دەڭگەيدەگى بانكتەرمەن ىنتىماقتاسۋ جانە ەدب ءموبيلدى قوسىمشالارى ارقىلى كورسەتىلەتىن قىزمەتتەردىڭ تىزبەسىن كەڭەيتۋ ءۇشىن اشىق»، - دەپ اتاپ ءوتتى ەڭبەك جانە حالىقتى الەۋمەتتىك قورعاۋ مينيسترلىگى مەملەكەتتىك قىزمەتتەردى تالداۋ جانە دامىتۋ دەپارتامەنتىنىڭ ديرەكتورى انار تولەۋبايەۆا.
