بوكسشى جانقوش تۇراروۆ سوت ورىنداۋشىسىن قورقىتىپ-ۇركىتكەن - ج س و پالاتاسى
جەكە سوت ورىنداۋشىلار پالاتاسىنىڭ مالىمەتىنشە، سوت ورىنداۋشىسى ا. ا. ەرمەكوۆكە شابۋىل الماتىنىڭ بوستاندىق اۋدانىنداعى نىساندى بۇزۋ كەزىندە جاسالعان.
«نىسان يەسى م. ن. ىسقاقوۆ سوت ورىنداۋشىسىن بۋىندىرىپ، عيماراتتى بۇزۋدى توقتاتۋدى تالاپ ەتكەن، كەيىن قابىرعاسى مەن وكپە تۇسىنان ۇرعان. سوققى پوليتسيا قىزمەتكەرلەرىنىڭ كوزىنشە بولعان. جەدەل جاردەم دارىگەرى سوققىنىڭ دەنساۋلىققا ورتا دارەجەدە زيان كەلتىرگەنىن ايتتى. پوليتسيا قىزمەتكەرلەرى قاشىپ كەتىپ، وقيعا ورنىندا بولماعان»، - دەپ حابارلادى رەسپۋبليكالىق ج س و پالاتاسىنان.
سوت ورىنداۋشىسى ۇرىپ-سوعۋ دەرەگى بويىنشا قىلمىستىق ءىس قوزعاۋ تۋرالى ارىز جازىپ، تاياق جەگەننەن كەيىن كوشەگە جۇگىرىپ شىققان ۋچاسكەلىك پوليتسياعا بەردى.
«وقيعا كەزىندە سوت ورىنداۋشىسىنا جانە باسقا ادامدارعا قىسىم جاساۋ ماقساتىندا ىسقاقوۆ بوكسشى تۇراروۆ جانقوش جاسۇلان ۇلىن شاقىرعان. وقيعا ورنىنا كەلگەن بوكسشى سوت ورىنداۋشىسىنان م. ن. ىسقاقوۆقا قاتىستى پوليتسياعا تۇسىرگەن ارىزىن الۋدى تالاپ ەتكەن. سونداي-اق، جانقوش تۇراروۆ بۇل ارەكەتتى زاڭسىزدىق دەپ ساناپ، وسى ءۇشىن قورقىتقان. كەيىن م. ن. ىسقاقوۆ پەن ج. ج. تۇراروۆ ا. ا. ەرمەكوۆكە قارسى فيزيكالىق سوققى كورسەتىپ، قورقىتا باستاعان. تىكەلەي قىسىم كورسەتىلىپ، سوت اكتىسىنىڭ تالاپتارىن ورىنداۋدان باس تارتۋعا ماجبۇرلەگەن»، - دەپ اتاپ ءوتتى پالاتادان.
وسىنداي كەلەڭسىز جايت سالدارىنان سوت ورىنداۋشىسى قىزمەتىن ورىنداي المادى. بۇعان دەيىن سوت ورىنداۋشىسى سوققىعا جىعىلعانىن جازعان بولاتىنبىز
اۆتور: الما مۇقانوۆا
