اقمولالىق دۇكەنشى قۇپيا ءسوز ارقىلى ەسىرتكى ساتىپ كەلگەن

كوكشەتاۋ. قازاقپارات - اقمولا وبلىسىندا الكوگول ءونىمىن ساتۋشى ءوزىنىڭ جۇمىس ورنىندا گاشيش ساۋدالاعان، دەپ حابارلايدى قازاقپارات ءتىلشىسى وبلىستىق ىشكى ساياسات باسقارماسىنا سىلتەمە جاساپ.

اقمولا وبلىستىق پوليتسيا دەپارتامەنتىنىڭ باسپا ءسوز قىزمەتىنىڭ مالىمەتىنشە، ەلوردا ماڭىنداعى ەلدى مەكەننىڭ 39 جاستاعى تۇرعىنى ۇزاق ۋاقىت بويى گاشيش پايدالانىپ كەلگەنىن انىقتالدى. ول ساۋدا ۇيىندە الكوگول ونىمدەرىن ساتۋمەن اينالىسقان. كەيىن الكوگول ونىمدەرىمەن بىرگە ەسىرتكى زاتىن ساتۋدى قولعا الادى.

«كۇدىكتى «ءونىمدى» تەك قۇپيا ءسوز ارقىلى ساتقان. ياعني، ساتىلىمدا جوق الكوگول ءونىمنىڭ قۇپيا ءسوزىن ايتقان ادامعا عانا ەسىرتكى ساتقان. وسىنداي 5 گرامنان استام گاشيش ساتۋ كەزىندە ونى پوليتسيا قىزمەتكەرلەرى قولعا ءتۇسىردى»، - دەدى ەسىرتكى قىلمىسىمەن كۇرەس باسقارماسىنىڭ اعا جەدەل ۋاكىلى، پوليتسيا مايورى ءرازيا كۋرسانوۆا.

ۆەدومستۆودان اتاپ وتكەندەي، قازاننىڭ 2-ىندە ەسىرتكى ساتۋشى ۇستالدى. جۇمىس ورنى بويىنشا سانكسيالانعان ءتىنتۋ بارىسىندا قۇرامىندا ەرەكشە ءيىسى بار سۇر- جاسىل ءتۇستى ۇنتاق ءتارىزدى كونسيستەنتسيالى زاتى بار پوليەتيلەن تۇيىنشەك تابىلدى. ساراپتاما تاعايىندالدى.

«وسىعان بايلانىستى قىلمىستىق كودەكستىڭ 1- بابى 297-بولىگى (ەسىرتكى زاتتارىن زاڭسىز وتكىزۋ) بويىنشا قىلمىستىق ءىس قولعا الىندى. كۇدىكتىگە قاتىستى بۇلتارتپاۋ شاراسى تاڭدالدى. اتالمىش باپتىڭ سانكتسياسىنا سايكەس، ەر ادام 10 جىلعا دەيىن باس بوستاندىعىنان ايىرىلۋى مۇمكىن»، - دەپ تولىقتىردى ر. كۋرسانوۆا.