ماۋلەن اشىمبايەۆ الەمدىك جانە ءداستۇرلى دىندەر ليدەرلەرى وكىلدەرىمەن كەزدەستى

ءدىن وكىلدەرى 6- قازان كۇنى نۇر-سۇلتان قالاسىندا وتەتىن XIX حاتشىلىق وتىرىسىنا قاتىسۋ ءۇشىن قازاقستانعا ارنايى كەلگەن بولاتىن، دەپ حابارلايدى قازاقپارات.

كەزدەسۋلەر بارىسىندا ماۋلەن اشىمبايەۆ بەيبىتشىلىك پەن كەلىسىمدى حالىقارالىق ارەنادا دارىپتەۋ ىسىندە قازاقستان ۇسىنعان ءدىنارالىق فورۋمنىڭ ەرەكشە ءرول اتقاراتىنىن اتاپ ءوتتى.

«وتكەن 18 جىلدىڭ ىشىندە الەمدىك جانە ءداستۇرلى دىندەر ليدەرلەرىنىڭ سەزى وزىق ءارى سالماقتى ديالوگ الاڭىنا اينالدى. وعان تەك ءدىن ليدەرلەرى عانا ەمەس، سونىمەن بىرگە الەمدىك دەڭگەيدەگى ىقپالدى ساياساتكەرلەر مەن حالىقارالىق ۇيىمداردىڭ كورنەكتى وكىلدەرى دە قاتىسىپ كەلەدى. بۇل سەزدىڭ شەشىمدەرىن ناتيجەلى ىسكە اسىرۋعا جانە ءدىنارالىق ديالوگ پەن كەلىسىم يدەيالارىن ىلگەرىلەتۋگە تىڭ سەرپىن بەرەدى»، - دەدى سەزد حاتشىلىعىنىڭ باسشىسى.

ءال-ازحار ۋنيۆەرسيتەتى يسلام زەرتتەۋلەر اكادەمياسىنىڭ باس حاتشىسى نازير مۇحاممەد مۇحاممەد ءال-نازير ايادپەن كەزدەسۋ كەزىندە جاڭا زاماندا وركەنيەتارالىق جانە ءدىنارالىق ديالوگتىڭ ءرولى ارتىپ كەلە جاتقانى ءسوز بولدى.

سۇحباتتاسۋشىلار تۋىنداعان ماسەلەلەردى شەشۋ كەزىندە قازاقستان تاراپىنان مۇنداي تاسىلگە باسا ءمان بەرىلەتىنىن اتاپ ءوتتى.

ءوز سوزىندە سەزد حاتشىلىعىنىڭ باسشىسى يسلام زەرتتەۋلەر اكادەمياسىنا كونفەسسياارالىق جانە وركەنيەتارالىق ديالوگتى دامىتۋ باعىتى بويىنشا نۇرسۇلتان نازاربايەۆ ورتالىعىمەن سەرىكتەستىكتى نىعايتۋ ءۇشىن قولداۋ كورسەتۋگە دايىن ەكەنىن جەتكىزدى.

سونداي-اق م. اشىمبايەۆ ورىس پراۆوسلاۆيە شىركەۋى ماسكەۋ پاتريارحاتى سىرتقى شىركەۋ بايلانىستارى ءبولىمىنىڭ ءدىنارالىق قاتىناستار جونىندەگى حاتشىسى، ءدىني قىزمەتكەر ديميتري سافونوۆپەن كەزدەستى.

ماۋلەن اشىمبايەۆ بىرنەشە جىلدان بەرى جالعاسىپ كەلە جاتقان ەكىجاقتى ىنتىماقتاستىقتى نىعايتۋعا جانە سەزد حاتشىلىعىنىڭ جۇمىسىنا تۇراقتى قاتىسىپ، ونىڭ ناتيجەلى بولۋىنا ۇلەس قوسقانى ءۇشىن مەيمانعا العىس ءبىلدىردى.

كەزدەسۋ كەزىندە سەزد الەمدىك كونفەسسيالاردىڭ قولداۋىنىڭ ارقاسىندا حالىقارالىق دەڭگەيدە ماڭىزدى رولگە يە بولىپ وتىرعانى دا ايتىلدى. سونىمەن قاتار سەنات ءتوراعاسى ءدىنارالىق ديالوگ جونىندەگى پاپا كەڭەسىنىڭ يسلام بويىنشا بيۋروسىنىڭ باسشىسى، مونسەنور حالەد اكاشەمەن كەزدەستى.

ماۋلەن اشىمبايەۆ ۆاتيكاننىڭ حالىقتار مەن دىندەر اراسىنداعى بەيبىتشىلىكتى، دوستىقتى جانە ىنتىماقتاستىقتى نىعايتۋعا قوسىپ كەلە جاتقان ۇلەسىن جوعارى باعالادى.

سۇحبات بارىسىندا تاراپتار وسىعان دەيىنگى سەزدەر اياسىندا اتقارىلعان جۇمىستاردىڭ ماڭىزىنا توقتالدى جانە ەرتەڭگى حاتشىلىق وتىرىسى دا فورۋمنىڭ حالىقارالىق بەدەلىن ارتتىرۋعا زور سەپتىگىن تيگىزەتىنىنە سەنىم ءبىلدىردى.

ال، بىرىككەن اراب امىرلىكتەرى مۇسىلمان اقساقالدار كەڭەسىنىڭ باس حاتشىسى سۇلتان فەيسال رۋمەيسيمەن كەزدەسۋدە ماۋلەن اشىمبايەۆ ب ا ءا- ءنىڭ الەمدىك ىنتىماقتاستىققا قوسىپ وتىرعان ۇلەسىنە نازار اۋداردى.

سەنات ءتوراعاسى 2019-جىلى ابۋ-دابيدە ريم پاپاسى فرانتسيسك پەن ءال-ازحاردىڭ جوعارعى يمامى شەيح احماد ءال-تايەب قول قويعان «بۇكىل الەمدە بەيبىتشىلىك پەن بىرلەسىپ ءومىر ءسۇرۋ ءۇشىن ادامزات باۋىرلاستىعى تۋرالى» تاريحي قۇجاتتى تىلگە تيەك ەتتى جانە ونىڭ ىسكە اسىرىلۋىنا ب ا ءا- ءنىڭ جاعداي جاساعانىن ايرىقشا اتاپ ءوتتى.

سونداي-اق تاراپتار نۇر-سۇلتانداعى ءدىنارالىق ديالوگ ءدىني ۇيىمداردى جاقىنداستىرۋ جانە XXI عاسىردىڭ جاھاندىق سىن-قاتەرلەرىنە بىرلەسىپ جاۋاپ ىزدەۋ جولىندا ماڭىزدى ءرول اتقارا بەرەتىنىنە سەنىم ءبىلدىردى.