قازاقستاندا اسكەردەن جالتارعانداردى ىزدەۋ ءتارتىبى وزگەرمەك

نۇر- سۇلتان. قازاقپارات - قورعانىس مينيسترلىگىنىڭ سايتىندا قازاقستان رەسپۋبليكاسىنىڭ ازاماتتارىن اسكەري قىزمەتكە شاقىرۋدى ۇيىمداستىرۋ جانە جۇرگىزۋ قاعيدالارىنا وزگەرىستەر مەن تولىقتىرۋلار ەنگىزىلەتىن ۇكىمەت قاۋلىسىنىڭ جوباسى جاريالاندى، دەپ حابارلايدى قازاقپارات ءتىلشىسى.

قۇجات جوباسىندا بۇدان بىلاي ازاماتتاردى اسكەري قىزمەتكە شاقىرۋدى كەيىنگە قالدىرۋ جانە ودان بوساتۋ دۇرىستىعى تەكسەرىلەتىنى ايتىلعان.

«ونىڭ ىشىندە بەيبىت ۋاقىتتا اسكەري قىزمەتكە جارامسىز، سوعىس ۋاقىتىندا جارامدىلىعى شەكتەۋلى جانە اسكەري ەسەپتەن شىعارا وتىرىپ، اسكەري قىزمەتكە جارامسىز دەپ تانىلعان اسكەرگە شاقىرىلۋشىلاردىڭ بارلىق جەكە ىستەرىنە تەكسەرۋ جۇرگىزەدى»، - دەلىنگەن زاڭ جوباسىندا.

مەرزىمدى اسكەري قىزمەتكە شاقىرۋدى كەيىنگە قالدىرۋدى نەمەسە ودان بوساتۋدى ۇسىنۋ ءتارتىبى «اسكەرگە شاقىرۋدى كەيىنگە قالدىرۋدى ۇسىنۋ» مەملەكەتتىك قىزمەت كورسەتۋ ەرەجەسىنە جانە «ازاماتتاردى اسكەري قىزمەتكە شاقىرۋدان بوساتۋ» مەملەكەتتىك قىزمەت كورسەتۋ ەرەجەسىنە بوىنشا جۇزەگە اسىرىلاتىنى ايتىلعان.

«اسكەرگە شاقىرىلۋشىلار اۋداندىق (قالالىق، وبلىستىق ماڭىزى بار قالانىڭ) اسكەرگە شاقىرۋ كوميسسياسىنا دالەلسىز سەبەپتەرمەن كەلمەگەن، سونداي- اق شاقىرۋ قاعازىن ازاماتتىڭ جەكە وزىنە تاپسىرۋ مۇمكىن بولماعان بارلىق جاعدايلار تۋرالى قورعانىس ىستەرى جونىندەگى باسقارمالاردىڭ (بولىمدەردىڭ) باستىقتارى ولاردى ىزدەستىرۋ جانە اسكەرگە شاقىرۋ پۋنكتىنە كەلۋىن قامتاماسىز ەتۋ ءۇشىن قازاقستان رەسپۋبليكاسىنىڭ ىشكى ىستەر ورگاندارىنا حابارلايدى»، - دەلىنگەن قۇجاتتا.

سونداي- اق، زاڭ جوباسىندا مەرزىمدى اسكەري قىزمەتكە شاقىرۋدان جالتارعان جانە اسكەرگە شاقىرۋ كەزەڭىندە مەديتسينالىق كوميسسيالارىنا كەلمەگەن شاقىرىلۋشىلاردى ىزدەستىرۋ ءۇشىن قازاقستان رەسپۋبليكاسىنىڭ ىشكى ىستەر ورگاندارى بىرلەسكەن قىزمەت جوسپارلارىن ازىرلەپ، بىرلەسكەن تۇراقتى جۇمىس ىستەيتىن توپتار قۇراتىنى ايتىلعان.

ول ءۇشىن مىناداي قۇجاتتاما ازىرلەنەدى:

1) اكىمدىكتىڭ «اسكەري ەسەپكە قويۋدان جانە اسكەري قىزمەتكە شاقىرۋدان جالتارعان ازاماتتاردى ىزدەستىرۋگە بايلانىستى ءىس- شارالار وتكىزۋ تۋرالى» قاۋلىسى (شەشىمى)؛

2) قورعانىس ىستەرى جونىندەگى باسقارمالار (بولىمدەر) مەن قازاقستان رەسپۋبليكاسىنىڭ ىشكى ىستەر ورگاندارى «ازاماتتاردى اسكەري قىزمەتكە شاقىرۋدى قامتاماسىز ەتۋ بويىنشا شارالار تۋرالى» بىرلەسكەن بۇيرىعى، ونىمەن بىرلەسكەن ىزدەستىرۋ توپتارى قۇرىلادى؛

3) العاشقى اسكەري ەسەپكە قويۋدان جانە اسكەري قىزمەتكە شاقىرۋدان جالتارعان ازاماتتاردى تۋعان جىلى بويىنشا ەسەپكە الۋ كىتابى جۇرگىزىلەدى.

اسكەري مىندەتتى ورىنداۋدان جالتارعان ازامات رەتىندە مىنا ساناتتاعى ادامدارعا ىزدەستىرۋ جۇرگىزىلەدى:

- قورعانىس ىستەرى جونىندەگى باسقارمالارعا (بولىمدەرگە) العاشقى اسكەري ەسەپكە قويۋعا بايلانىستى ءىس- شارالارعا كەلۋدەن جالتارعاندار؛

- اسكەري قىزمەتكە شاقىرۋعا بايلانىستى ءىس- شارالارعا كەلۋدەن جالتارعاندار؛

- شاقىرۋ كوميسسياسىنا كەلۋدەن جالتارعاندار؛

- اسكەرگە جونەلتۋگە كەلۋدەن جالتارعاندار؛

- مەديتسينالىق تەكسەرۋدەن وتۋدەن جالتارعاندار؛

- اسكەري ەسەپتەن شىعارۋسىز كەتكەن جانە جاڭا تۇرعىلىقتى جەرى بويىنشا اسكەري ەسەپكە ۋاقتىلى تۇرماعان ازاماتتار (ۇزاق ىزدەستىرۋدەگى ازاماتتار).

اۆتور: ەسىمجان ناقتىباي