كوروناۆيرۋس: سيمپتومسىز ەكى ناۋقاس ءۇشىن شىڭجاڭعا كىرىپ- شىعۋ شەكتەلدى

بەيجىڭ. قازاقپارات - قىتايدا شىڭجاڭ- ۇيعىر اۆتونوميالىق اۋدانى ىلە قازاق اۆتونوميالىق وبلىسىنىڭ قۇلجا قالاسىندا ەكى ادامنىڭ كوروناۆيرۋسپەن سيمپتومسىز اۋىرعانى انىقتالىپ، دۇيسەنبى كۇنى سوعان بايلانىستى مۇندا كىرىپ- شىعۋعا ۋاقىتشا شەكتەۋلەر ەنگىزىلدى، دەپ حابارلايدى قازاقپاراتتىڭ مەنشىكتى ءتىلشىسى.

وتكەن جەكسەنبى كۇنى قىتايدىڭ شىڭجاڭ- ۇيعىر اۆتونوميالىق اۋدانى ىلە قازاق اۆتونوميالىق وبلىسىنىڭ قورعاس قالاسىندا كوروناۆيرۋسپەن سيمپتومسىز اۋىرعان ەكى ادام انىقتالدى. سوعان بايلانىستى قورعاس قالاسىنان 90 شاقىرىم جەردە ورنالاسقان قۇلجا قالاسىنىڭ اۋەجايىندا رەيستەردىڭ % 70 توقتاتىلدى.

جەرگىلىكتى ب ا ق- تىڭ حابارلاۋىنشا، دۇيسەنبى كۇنى قۇلجا قالاسىن شىڭجاڭنىڭ باسقا ەلدى مەكەندەرىمەن بايلانىستىراتىن تەمىرجول جانە اۆتوبۋس قوزعالىسى توقتادى. سونىمەن قاتار دۇيسەنبى كۇنى ءۇرىمجى قالاسىنىڭ اۋە ايلاعىندا 165 رەيس ۇشپاي قالدى. شىڭجاڭدا كوروناۆيرۋستىڭ قايتا ورشۋىنە بايلانىستى گۋاڭجوۋ جانە شەنيان سياقتى مەگاپوليستەر بيلىگى قورعاس جانە قۇلجا قالالارىنان كەلۋشىلەردەن مىندەتتى تۇردە تۇرعىلىقتى جەرى بويىنشا دەنساۋلىعى تۋرالى دەرەكتەردى ۇسىنۋدى تالاپ ەتۋدە.

ەسكە سالا كەتەيىك، وسى جىلدىڭ تامىزىندا قىتايدا شىڭجاڭنىڭ بوراتالا- موڭعول اۆتونوميالىق وبلىسىنىڭ الاشاڭقاي قالاسىندا كوروناۆيرۋسپەن سيمپتومسىز اۋىرعان ادامدار انىقتالدى. وسىعان بايلانىستى ءبىر كۇن ىشىندە اتالمىش اۆتونوميالىق وبلىستىڭ 500 مىڭعا جۋىق تۇرعىنى ىندەتكە قارسى تەست تاپسىردى.

اۆتور: ءبيبىحان سەرىكوۆا