ەلوردادا كوشپەندىلەر ومىرىنەن سىر شەرتەتىن گرافيكالىق كورمە اشىلدى
«بيىلدىققا نۇر- سۇلتان قالاسىندا ەكىنشى جەكە كورمەم ءوتىپ وتىر. العاشقىسى كوكتەمدە ءوتتى. بۇل جولعى كورمە گرافيكا ونىڭ ىشىندە لينوگراۆيۋراعا ارنالىپ وتىر. اتالعان ونەر ءتۇرى ەلىمىزدە دامۋ جاعىنان كەنجە قالعان دەسەم دە بولادى. ونىڭ سەبەبى - لينوگراۆيۋرا ۇزاق ۋاقىت پەن قاجىرلى ەڭبەكتى قاجەت ەتەدى. سونداي- اق، شىدامدىلىق پەن كريەۆتيۆ كەرەك. گرافيكانىڭ وسى ءتۇرىنىڭ مۇمكىندىكتەرىن كورسەتۋ جانە ونى كوپشىلىككە ناسيحاتتاۋ ماقساتىندا بۇگىنگى كورمەنى ۇيىمداستىرىپ وتىرمىز»، - دەدى كورمە اۆتورى باتۋحان بايمەن.
كورمەگە 50 شاقتى گرافيكالىق تۋىندى قويىلعان. سول سياقتى اۆتور بۇعان دەيىن تاشكەنت، بىشكەك، كيپر، ىستانبۇل، بەرلين قالاسىندا 11 رەت جەكە كورمەسىن وتكىزگەن.
«بۇگىنگى كورمەگە 2019-2020 -جىلدارى جاسالعان جاڭا جۇمىستارىم قويىلعان. مۇنداعى تۋىندىلار تۋرالى قالىڭ جۇرت اسا بىلە بەرمەيدى. شىنىن ايتۋ كەرەك، كورمەگە قويىلعان كارتينالاردىڭ ءمانى مەن سىرىن كەلۋشىلەر ءبىر قاراعاننان تۇسىنە قويمايدى. شابىتقا كەلسەك، كۇنى- ءتۇنى سۋرەت سالۋمەن اينالىسامىن دەپ ايتا المايمىن. ماعان يدەيا كەز كەلگەن ۋاقىتتا كەلەدى، سەرۋەندەپ جۇرگەندە، اس ءىشىپ وتىرعاندا، كەيبىر يدەيالاردى ينتەرنەتتەن قارايمىن. ەڭ باستىسى - تىڭ يدەيا كەلگەندە ونى قاعىپ الۋ، ياعني تىڭ يدەيادان كوز جازىپ قالماۋ كەرەك. ول ساعىم سەكىلدى، دەر كەزىندە ۇستاپ قالماساڭ، ول يدەيا قايتىپ ورالمايدى»، - دەيدى ول.
ەلوردا جۇرتشىلىعى اتالعان كورمەنى «Forte Kulanshi Artspace» گالەرەياسىنان (دوستىق كوشەسى 8/1) دۇيسەنبى- جۇما كۇندەرى ساعات 10:00-18:00 ارالىعىندا تەگىن تاماشالاي الادى. بۇگىن باستالعان كورمە 20 -قاراشاعا دەيىن جالعاسادى.
«الدىمەن باتۋحاننىڭ جۇمىسىن بىزگە پوشتا ارقىلى جىبەردى. سودان كەيىن ءبىز ونلاين تانىستىق. تۋىندىلارعا كەلسەك، جالپى گرافيكانىڭ ىشىندە گراۆيۋرا - سۋرەتشىلەر سيرەك اينالىساتىن سالا. مەنى تاڭعالدىرعانى - تۋىندىلاردىڭ كەڭدىگى مەن ماعىناسى. اۆتور ءوز شىعارمالارى ارقىلى تۇتاس قوعام مەن ونداعى الەۋمەتتىك ماسەلەلەردى كورسەتىپ وتىر. بۇل تۋىندىلاردىڭ باستى قۇندىلىعى - قولدىڭ جۇمىسى. ويلاپ كورىڭىز، ءبىر جۇمىستى ازىرلەۋگە اپتالاپ، كەيدە ءتىپتى ايلاپ ۋاقىت كەتەدى، ال بۇل جەردە 50 تۋىندى قويىلعان»، - دەيدى KULANSHI زاماناۋي ونەر ورتالىعىنىڭ جەتەكشىسى ءلايلا ماحات.
