ەلوردالىق ەگىز قىز تۇركيانىڭ «داۋىس» جوباسىنىڭ قازىلار القاسىن تاڭعالدىردى
كورمەي تىڭداۋ كەزىندە قىزدار ءانشى Jessie J- Price Tag ءانىن ورىندادى. بارلىق تالىمگەرلەر قازاقستاندىقتارعا بۇرىلدى. ۇزاق تالقىلاۋدان كەيىن ولار تۇركياداعى تانىمال ءانشى مۇرات بوز كومانداسىنا باردى.
«ەسىمدە، دەمالىستاردىڭ بىرىندە ايانا قوڭىراۋ شالىپ، ەسكى قالاداعى كاستينگكە كەلۋىمدى ءوتىندى. مەن بۇل يدەياعا قارسى ەكەنىمدى ايتتىم. ارينە، مەن ءان ايتقاندى جاقسى كورەمىن، ءبىراق مەنىڭ ءان ايتقانىمدى تۋىستارىم مەن جاقىندارىم عانا ەستيتىن. ءبىراق ول ايتقانىنان قايتپاي مەنى كوندىردى. كاستينگتەن كەيىن بىزگە: «ءبىز سەندەرگە حابارلاسامىز« دەدى. مەن اياناعا ولار بىزگە قوڭىراۋ شالمايتىنىن ايتتىم. ايانا وتەتىنىمىزگە سەنىمدى بولدى. ءسويتىپ كاستينگتەن وتتىك، ءبىزدى ىستامبۇلعا شاقىردى»، - دەدى ديانا تايبەكوۆا.
اپالى-سىڭلىلەر ىرىكتەۋ كەزەڭىنەن جانە قويىلىمنىڭ وزىنەن ۇمىتىلماس ەموتسيالار العانىن ايتتى. ولار ءار ايماقتىڭ تالانتتى ورىنداۋشىلارىمەن كەزدەستى.
«ۋايىمداعاننان قولدارىم مەن اياقتارىم دىرىلدەپ كەتتى. ساحنادا تۇرعاندا ەشكىمدى كورمەدىم. قازىلار القاسى بۇرىلعانىن نەمەسە بۇرىلماعانىن تۇسىنبەدىم، ءارى قاراي ءان ايتۋدى جالعاستىردىم. مۋزىكا اياقتالعاندا بارىپ تورتەۋىنىڭ دە بۇرىلعانىن كوردىم. سول كەزدە وتەتىنىمىزدى ءتۇسىندىم»، - دەدى ديانا.
قازىر اپالى-سىڭلىلەر انتاليادا تۇرادى. ديانا تۋريزم سالاسىندا ءتورت جىلدان بەرى، ايانا 7 ايدان بەرى جۇمىس ىستەيدى. قىزدار تۇركياعا ءتورت جىل بۇرىن العاش رەت پراكتيكادان وتۋگە كەلگەن. ولار نۇر-سۇلتان قالاسىنداعى تۇران كوللەدجىن تۋريزم مەنەدجەرى ماماندىعى بويىنشا بىتىرگەن. قازاقستاندا انشىلەر X- Factor ،Qazaqstan daysy جوبالارىنا قاتىسقان.
