ەلوردا پوليسەيلەرى كوپىردەن سەكىرگەن جۇكتى ايەلدى قۇتقارىپ قالدى

نۇر- سۇلتان. قازاقپارات - ەلوردالىق پوليتسەيلەر وزەنگە سەكىرگەن جۇكتى ايەلدى قۇتقاردى. بۇل تۋرالى «قازاقپارات» حالىقارالىق اقپارات اگەنتتىگى Polisia.kz سايتىنا سىلتەمە جاساپ حابارلايدى.

استانالىق پوليسەي الماز قۇلتانوۆ قابانباي باتىر داڭعىلىندا قىزمەت بابىمەن ءجۇرىپ، ساعات 12:20 شاماسىندا «رامستور» ساۋدا ءۇيى ماڭىنداعى ەسىل وزەنىنىڭ كوپىرىندە بەيتانىس قىزدىڭ ادەتتەن تىس ارەكەتتەرىن بايقاپ قالادى.

كەنەت قىز سىرتقى كيىمدەرىن شەشىپ، سۋعا سەكىرۋگە ارەكەتتەنەدى. ول دەرەۋ جەدەل باسقارۋ ورتالىعىنىڭ كەزەكشىسىنە حابارلاپ، ءوزى كوپىرگە قاراي بەتتەيدى. ول كەزدە ايەل دە سۋعا سەكىرىپ ۇلگەرگەن ەدى. قۇلتانوۆ تا ونىڭ ارتىنان سۋعا سەكىرەدى.

«ءتارتىپ ساقشىسى ايەلگە دەيىن ءجۇزىپ بارىپ، كيىمىنەن ۇستاپ، جاعاعا قاراي بەت الدى. وسى كەزدە سەرىكتەستەرى اسىلحان نۇرمۇحامبەتوۆ قۇتقارۋ شەڭبەرىن لاقىتىرىپ، نۇرسۇلتان ساريەۆ تە سەرىگىنە كومەكتەسۋ ءۇشىن سۋعا سەكىردى»، - دەپ جازادى Polisia.kz.