ومانعا «شاحين» داۋىلى ءتوندى

ماسكات. قازاقپارات - وماننىڭ توتەنشە جاعدايلار ورتالىعى ەل استاناسىنىڭ تۇرعىندارىن «شاحين» داۋىلىنان ءقاۋىپ تونۋىنە بايلانىستى جاقىن ماڭداعى ەز- زاحير پروۆينتسياسىنان قاۋىپسىز ايماققا كوشۋگە شاقىردى، دەپ حابارلايدى «قازاقپارات» ح ا ا ءتىلشىسى قازاقستاننىڭ ومان سۇلتاندىعىنداعى ەلشىلىگىنە سىلتەمە جاساپ.

ومان اقپارات اگەنتتىگىنىڭ مالىمەتتەرى بويىنشا، داۋىل وشاعى جاعالاۋدان 120 ك م قاشىقتىقتا جاتىر. ال ونىڭ ديامەترى 11-دەن 14 ك م ارالىعىندا. داۋىلدىڭ وشاعى قۇرعاق ايماققا بۇگىن ساعات 18:00 مەن 21:00 ارالىعىندا جەتەدى.

«ماسكات پروۆينتسياسىنا ورتاشا جانە نوسەر جاۋىن جاۋۋى مۇمكىن. بۇل رەتتە نوسەر جاۋىن وڭتۇستىك جانە سولتۇستىك ەل- باتينا پروۆينتسيالارىنا كوپ جاۋادى جانە وسى ايماقتا جەل دە كۇشتى بولايىن دەپ تۇر» - دەپ مالىمدەدى ومان ازاماتتىق اۆياتسيا باسقارماسىنىڭ مەتەورولوگى مۋحامماد بين الي ال- ماشايحي.

ونىڭ سوزىنشە، ازاماتتىق اۆياتسيا باسقارماسىنىڭ مونيتورينگ ستانتسيالارىندا تىركەلگەن جەلدىڭ جىلدامدىعى ساعاتىنا 55 ك م- ءدى قۇراپ وتىر، ال ەكپىنى ساعاتىنا 75 ك م- گە جەتەدى. قازىرگى تاڭدا ومان استاناسىنداعى اۋەجايدا بارلىق رەيستەر توقتاتىلدى. جاۋىن سالدارىنان سۋدىڭ تەرەڭدىگى 200 دەن 500 م م- گە دەيىن ارالىقتا بولادى دەپ كۇتىلۋدە. ءوز كەزەگىندە ول سۋ تاسقىنىنا سەبەپشى بولۋى مۇمكىن.

كۇننىڭ بۇزىلۋىنا بايلانىستى ەسكەرتۋ دە جاريالاندى. سۋداعى تولقىنداردىڭ بيىكتىگى قازىرگى تاڭدا 8-12 مەترگە جەتۋى مۇمكىن. ومان بيلىگى تۇرعىنداردى جەدەل تۇردە ۇكىمەت دايىنداعان ارنايى ورىندارعا بارۋعا شاقىردى. قازاقستاننىڭ ومانداعى ەلشىلىگىنىڭ وكىلدەرى وسى وقيعانىڭ سالدارىنان زارداپ شەككەندەرىڭ اراسىندا قازاقستاندىقتاردىڭ جوق ەكەنىن مالىمدەدى.

«وكىنىشكە قاراي، قازىرگى تاڭدا «شاحين» داۋىلى سالدارىنان مەرت بولعاندار مەن جوعالىپ كەتكەندەر تۋرالى مالىمەتتەر كەلىپ جاتىر. ەلشىلىكتىڭ حابارلاۋىنشا، زارداپ شەككەندەر مەن جوعالعانداردىڭ اراسىندا قازاقستان ازاماتتارى جوق. ەلشىلىك وكىلدەرى وماندا جۇرگەن قازاقستان ازاماتتارىن قاۋىپسىزدىك تالاپتارىن قاتاڭ ۇستانىپ، سۇلتاندىق بيلىگىنىڭ كەڭەسىن تىڭداۋعا شاقىردى»، - دەپ حابارلادى قازاقستاننىڭ ديپلوماتيالىق وكىلدىگى.

قازاقستان ەلشىلىگىنىڭ كونسۋلدىق ەسەبى بويىنشا وماندا شامامەن ەلىمىزدىڭ 70 ازاماتى بار. ەلشىلىك سونىمەن قاتار جەدەل قىزمەت تەلەفوندارىنىڭ ءنومىرىن جاريالادى. ومانداعى قازاقستان ازاماتتارى توتەنشە جاعداي تۋىنداعاندا وسى تەلەفون نومىرلەرىنە حابارلاسۋى كەرەك.

وسى كەزدە ومان استاناسىنىڭ كوپتەگەن كوشەلەرىن سۋ باسقان. وسىعان بايلانىستى تۇرعىنداردىڭ قيمىل- قوزعالىسى قيىن بولىپ تۇر. رەسەيلىك تاسس اگەنتىگىنىڭ حابارلاۋىنشا، داۋىل كەلە جاتقانى تۋرالى حابار ومان، بىرىككەن اراب امىرلىكتەرى مەن ساۋد ارابياسىنا سەنبى كۇنى جەتكەن. وماندا جەكسەنبى مەن دۇيسەنبى مەملەكەتتىك جانە جەكە سەكتوردا رەسمي تۇردە دەمالىس بولىپ جاريالاندى. تسيكلون بىرنەشە كۇندە ءۇندى جاعالاۋلارىنا جاقىن جەردەن اراب تەڭىزىنىڭ سولتۇستىك اكۆاتورياسىنا قاراي قالىپتاسىپ، پارسى شىعاناعىنا جاقىنداعان تۇستا كۇش الا باستادى. تابيعاتتىڭ مۇنداي قۇبىلىسى مەتەوباقىلاۋ تاريحىندا العاش رەت تىركەلىپ وتىر. ول وسى ۋاقىتتا يران اۋماعىنان ءوتتى، وندا جوعالىپ كەتكەندەر مەن زارداپ شەككەندەردىڭ بار ەكەنى حابارلاندى.