جانارماي تاپشىلىعى: اتىراۋ مۇناي وڭدەۋ زاۋىتى ديزەل وندىرۋگە كىرىسەدى

اتىراۋ. قازاقپارات - اتىراۋ مۇناي وڭدەۋ زاۋىتى ماۋسىمارالىق ديزەل وتىنىن وندىرۋگە كىرىسەدى، دەپ حابارلايدى قازاقپارات.

كاسىپورىننىڭ باسپا ءسوز قىزمەتىنىڭ مالىمەتىنشە، وندىرىستىك جوسپارعا جانە ىشكى نارىقتىڭ سۇرانىسىنا سايكەس، 5- گرادۋستا قاتپايتىن ماۋسىمارالىق ديزەل وتىنىن شىعارۋعا تەحنولوگيالىق قوندىرعىلاردى دايىنداۋ ءجۇرىپ جاتىر.

«بۇل ءونىم اۋا تەمپەراتۋراسى 5 گرادۋستان تومەندەمەيتىن ماۋسىمارالىق كەزەڭدە تۇتىنۋعا ارنالعان. زاۋىتتا قايتا جاڭعىرتۋ جوباسى شەڭبەرىندە سالىنعان جاڭا تەحنولوگيالىق قوندىرعىلاردىڭ ناتيجەسىندە 2019-جىلى ك4 ەكولوگيالىق كلاسىنا جاتاتىن ديزەلدىڭ (د ت- ە) وسى ءتۇرىن ءوندىرۋ باستالدى. اۋا تەمپەراتۋراسى تومەندەگەن كەزدە ديزەل وتىننىڭ - 15، - 25، - 32 جانە Khazar-38، Altay-45 سەكىلدى تۇرلەرىن شىعارۋدى باستايدى»، - دەپ حابارلادى زاۋىتتىڭ باسپا ءسوز قىزمەتى.

بيىلعى قىركۇيەكتە ەنەرگەتيكا مينيسترلىگى ىشكى نارىقتى ديزەل وتىنىمەن قامتۋدىڭ كۇردەلى جاعدايىنا بايلانىستى «قازمۇنايگاز» ۇ ك ا ق- مەن بىرلەسىپ، اتىراۋ مۇناي وڭدەۋ زاۋىتىندا جۇرگىزىلەتىن اعىمداعى جوندەۋدى كەيىنگە قالدىرۋ تۋرالى شەشىم قابىلدانعان.

«اتىراۋ مۇناي وڭدەۋ زاۋىتى بيىلعى 8 ايدا 1027123 توننا ديزەل وتىنىن ءوندىردى. بۇل بىلتىرعى وسى كەزەڭدەگىمەن سالىستىرعاندا 10,5 مىڭ تونناعا ارتىق. زاۋىت 8 ايدا تاپسىرىس بەرۋشىلەرگە 1 ميلليون 320 مىڭ توننا ديزەل جىبەردى. بۇل وتكەن جىلعىدان 13 مىڭ تونناعا ارتىق. بيىلعى 5 مامىردا ديزەل وتىنىنىڭ تاۋارلىق پاركىنىڭ رەزەرۆۋارلارى ىسكە قوسىلدى»، - دەپ ءمالىم ەتتى باسپا ءسوز قىزمەتىنەن.