ەلوردادا «قايىرىمدىلىق كەرۋەنى» بايقاۋىنىڭ جەڭىمپازدارى ماراپاتتالدى
بايقاۋعا قايىرىمدى ىستەرمەن تۇراقتى تۇردە اينالىسىپ، قوعامعا كومەگى تيگەن ازاماتتار قاتىستى، دەپ حابارلايدى قازاقپارات قالا اكىمدىگىنىڭ رەسمي سايتىنا سىلتەمە جاساپ.
نۇر-سۇلتان قالاسى الماتى اۋدانىنىڭ اكىمى ەرلان بەكمۇرزايەۆتىڭ ايتۋىنشا، رەسپۋبليكالىق سايىسقا جالپى سانى 670 ءوتىنىم قابىلدانسا، ونىڭ 100 گە جۋىعى - ەلوردا تۇرعىندارىنان.
«قاتىسۋشىلاردىڭ اراسىندا ۇلكەن قۇرىلىس كومپانياسىنىڭ باسشىلارى، ەڭ باستىسى دارىگەرلەر، ءورت سوندىرۋشىلەر بولدى. قايىرىمدىلىق شارالارىمەن كۇندەلىكتى اينالىساتىن جانداردان قوعامعا كەلەر پايدا زور. سول سەبەپتى ولاردى ماراپاتتاۋ ءراسىمى جوعارى دەڭگەيدە ءوتتى»، - دەدى قازاقستان ىسكەر ايەلدەر قاۋىمداستىعىنىڭ مۇشەسى نازگۇل ماعجان.
قاتىسۋشىلاردى ءار سالادان كورۋگە بولادى.
«قايىرىمدىلىق كەرۋەنى» مارافونىنىڭ نومينانتى بولعانىما قۋانىشتىمىن. بىلتىر كوماندامىزبەن بىرگە ەلىمىز بويىنشا ەكى مىڭنان استام ادامدى ءتۇرلى داعدىلارعا ۇيرەتتىك. وعان ءتۇرلى سالانىڭ ساراپشىلارى كومەكتەستى. جىل بويى وقىتىپ، سەرتيفيكاتتار تاپسىردىق. وسىلايشا جاڭا مۇمكىندىكتەر سىيلادىق. ءبارىن قايىرىمدىلىقپەن اينالىسۋعا شاقىرامىن. جاقسىلىقتى كەز كەلگەن ساتتە جاساۋعا بولادى»، - دەدى قوعام قايراتكەرى اقەركە بەرلىباي.
بايقاۋ قاتىسۋشىلارىنىڭ ءبىرى، ەلورداداعى 3№ كوپبەيىندى ينفەكتسيالىق اۋرۋحانانىڭ پۋلمونولوگيا ءبولىمى مەڭگەرۋشىسى، دارىگەر ساپاركۇل بەردەشوۆا كوروناۆيرۋس ىندەتى ەندى باستالعان شاقتا كۇنى-ءتۇنى اۋرۋحانادا قالىپ، جاپپاي ءتۇسىپ جاتقان ناۋقاستاردى ەمدەگەن.
«كوروناۆيرۋس باستالىسىمەن، ءبىزدى پروۆيزورلىق ورتالىققا اۋىستىردى. مايدان دالاسىنا مىلتىقسىز توپ ەتە قالعانداي بولدىق. كۇنىنە 200 دەي ادام تۇسكەن كەزدەر بولدى. توسەك-ورىن جەتىسپەيدى. ەكى اپتا بويى ۇيگە بارماي، اۋرۋحانادا قالعان تۇندەرى ۇيىقتايتىن ورىن جوق بولعان سوڭ، تۇرەگەپ وتىرىپ كوز ىلەتىنبىز. ادام شىعىنى بولماسا ەكەن، ناۋقاستار جازىلىپ شىقسا ەكەن دەپ تىلەدىك. ءبىراق كوپ ادامنان ايىرىلدىق. بىزگە ءوز اياعىمەن كەلگەن كىسىلەردىڭ ەرتەڭىنە ءمايىتى شىعىپ جاتتى. قانشا وتباسىنىڭ بىرنەشە ادامى قاتار كەتتى. بۇگىن اكەسى، ەرتەڭ ۇلى... ودان قالسا، YouTube- ءتىڭ جاقسى ماعىناسىندا دا، جامان ماعىناسىندا دا «گۇلى» بولدىق.
«سەندەر قولدان جاساپ جاتىرسىڭدار، سەندەر ولتىردىڭدەر» دەپ بىزگە لاعىنەت جاۋدىرعانداردى دا تالاي كوردىك. ينفەكسيانىڭ ورتاسىندا جۇرگەن سوڭ، ءوزىم دە اۋىرىپ قالدىم. جولداسىمنىڭ وكپەسى %70، وزىمدىكى %45 زاقىمدانىپ، ايتەۋىر، جازىلىپ شىقتىق»، - دەيدى ول.
ساپاركۇل استانالىقتارعا عانا ەمەس، رەتى كەلسە، بارلىق قازاقستاندىققا كومەكتەسۋگە تىرىسقان. سول سياقتى مەديتسينا سالاسى بويىنشا حالىققا ۇشان-تەڭىز پايداسى تيگەن اننا تسەپكە، تاتيانا تسەچويەۆا ماراپاتتالدى.
سونداي-اق قاتىسۋشىلاردىڭ ىشىندە توتەنشە جاعداي كەزىندە تەگىن پسيحولگيالىق كەڭەس بەرۋمەن اينالىسقان استانالىقتار دا بار. ماسەلەن، دينارا جاقىپبەكوۆا مەن ايدانا بەيسەمبەنوۆا Bek Air اۋەكومپانياسىنىڭ ۇشاعى اپاتقا ۇشىراعاندا، توتەنشە جاعدايعا ۇشىراعاندار مەن ولاردىڭ جاقىندارىنا پسيحولوگيالىق كومەك كورسەتكەن.
ايدارحان كەمالادينوۆ ءورت لاۋلاپ جاتقان پاتەردەن جۇكتى ايەل مەن ءتورت بالانى قۇتقارىپ قالسا، ءنادىر ومارعازيەۆ كىشكەنتاي بالانى قۇدىقتان شىعارىپ العان. ال سەرگەي جانە اننا لياحوۆتار باسسەينگە باتىپ كەتكەن بالانى الىپ شىعىپ، العاشقى كومەك كورسەتىپ، ءولىم اۋزىنان اراشالاپ قالعان.
ماراپات يەلەرىنىڭ ىشىندە ەمين اسكەروۆ، ەلميرا ساقالوۆا، بوتاگوز يگەنبايەۆا، ءاليا ەرجانوۆا، مارجان ابدۋللينا، دينارا سىرعابايەۆا، رايسا اليۋشينا، عابيت ساتماعانبەتوۆ، «ماما پرو» الەۋمەتتىك تۇرعىدان وسال ايەلدەردى قولداۋ جانە دامىتۋ قورى، «بلاگوداريۋ» قوعامدىق قورى جانە «epro» كورپوراتيۆتىك قورى بار.
ەستەرىڭىزگە سالا كەتسەك، قازىر «قايىرىمدىلىق كەرۋەنى» IV رەسپۋبليكالىق بايقاۋىنا قاتىسۋعا ءوتىنىم قابىلدانىپ جاتىر.
