ايدا بالايەۆا الماتىدا قوعامدىق كەڭەس مۇشەلەرىمەن كەزدەستى

الماتى. قازاقپارات - اقپارات جانە قوعامدىق دامۋ ءمينيسترى ايدا بالايەۆا الماتى قالالىق قوعامدىق كەڭەس مۇشەلەرىمەن كەزدەستى، دەپ حابارلايدى قازاقپارات ءتىلشىسى.

كەزدەسۋ بارىسىندا «قوعامدىق كەڭەستەر تۋرالى» زاڭ جوباسىنا ەنگىزىلگەن وزگەرىستەر تالقىلاندى.

«جىل باسىندا مەملەكەت باسشىسى اتالعان زاڭعا قول قويدى. قوعامدىق كەڭەستەردىڭ وكىلەتتىگى كەڭەيدى. وسى زاڭ قابىلدانعان ۋاقىتتان بەرى قوعامدىق كەڭەستەردىڭ جۇمىسىندا ايتارلىقتاي وزگەرىستەر بولدى. وزدەرىڭىزگە ءمالىم، مەملەكەت باسشىسى قاسىم-جومارت توقايەۆ بيىلعى قازاقستان حالقىنا جولداۋىندا ازاماتتىق قوعامدى دامىتۋ ماسەلەسىنە ايرىقشا توقتالدى. اتاپ ايتقاندا، جەرگىلىكتى ءوزىن-ءوزى باسقارۋ جۇيەسىن ودان ءارى جاڭعىرتۋدىڭ ماڭىزدى فاكتورى - ازاماتتىق مادەنيەتتى دامىتۋ ەكەنىن اتادى. ديالوگ پەن ازاماتتىق قاتىسۋ ءداستۇرىن دامىتۋ، ىنتىماقتاستىعىمىز بەن بىرلىگىمىزگە نەگىز بولاتىن وزىق قۇندىلىقتاردى دارىپتەۋ - ءبىز ءۇشىن ماڭىزدى. ارينە، بۇل ىستە بىزگە تاۋەلسىز ينستيتۋت رەتىندە قالىپتاسقان قوعامدىق كەڭەستەردىڭ قولداۋى قاجەت»، - دەدى مينستر.

سونداي-اق، ايدا بالايەۆا قوعامدىق كەڭەستەردىڭ قىزمەتىن جەتىلدىرۋ مەن ۇيلەستىرۋ بويىنشا مينيسترلىك تاراپىنان جۇرگىزىلىپ جاتقان جۇمىستاردى ايتتى.

قوعامدىق كەڭەس مۇشەلەرىمەن بىرگە زاڭعا تاۋەلدى اكتىلەر ازىرلەندى: قوعامدىق كەڭەس تۋرالى ۇلگى ەرەجە، قوعامدىق باقىلاۋدى ۇيىمداستىرۋ مەن جۇرگىزۋ ەرەجەسى، قوعامدىق كەڭەستەر قۇرامى بويىنشا ۇسىنىمدار. بۇل نورماتيۆتىك اكتىلەر تۇگەل ءماسليحاتتارعا، اكىمدىكتەرگە جانە تىكەلەي قوعامدىق كەڭەستەرگە جىبەرىلدى. زاڭنامانىڭ نەگىزگى ەرەجەلەرىن ءتۇسىندىرۋ ءۇشىن ءبىرقاتار ادىستەمەلىك وقىتۋ سەمينارلارى وتكىزىلدى.

كۆازي مەملەكەتتىك سەكتوردىڭ 12 سۋبەكتىسىندە قوعامدىق كەڭەس قۇرىلدى.

«سامۇرىق قازىنا» قورىنىڭ قوعامدىق كەڭەسى قازىر قۇرىلىپ جاتىر.

«بۇگىنگى تاڭدا قازاقستاندا 249 قوعامدىق كەڭەس بار، ونىڭ 33 ءى - رەسپۋبليكالىق، 216 سى - جەرگىلىكتى دەڭگەيدە. مينيسترلىك «رۋحاني جاڭعىرۋ» الەۋمەتتىك دامۋ ينستيتۋتىمەن جانە ساراپشىلار قاۋىمداستىعىمەن بىرگە قوعامدىق كەڭەس تۋرالى ۇلتتىق بايانداما ازىرلەپ جاتىر. كەشە عانا، 30- قىركۇيەكتە، اتالعان جوبانىڭ ساراپتامالىق تالقىلاۋى ءوتتى. سونىمەن قاتار، قوعامدىق كەڭەستەردىڭ تۇرعىندارمەن كەرى بايلانىس مەحانيزمدەرىن كۇشەيتۋ ءۇشىن «KAZKENES» اقپاراتتىق پورتالىن تانىمال ەتۋ بويىنشا جۇمىس جۇرگىزىلۋدە. ول ارقىلى ازاماتتار ەلىمىزدىڭ بارلىق ايماقتارىنداعى قوعامدىق كەڭەستەرگە جۇگىنە الادى»، - دەدى ول.

ەسكە سالايىق، بيىلعى 3- قاڭتاردا مەملەكەت باسشىسى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە قوعامدىق كەڭەستەردىڭ قىزمەتى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسىنىڭ زاڭىنا قول قويدى.