ەير استانا ورتالىق ازيانىڭ ۇزدىك اۋەكومپانياسى دەپ تانىلدى
اۋەكومپانيا Skytrax رەيتينگىنىڭ 2012-2019 -جىلدار ارالىعىندا الدىڭعى ماراپاتتارىنا يە بولعان. وتكەن جىلى Skytrax سىيلىق باعدارلاماسى پاندەمياعا بايلانىستى توقتاتىلدى، - دەپ حابارلايدى Kaz.tengritravel.kz ءتىلشىسى.
«پاندەميا قيىندىعىنا قاراماستان، جوعارى دەڭگەيدەگى قىزمەت كورسەتۋ ءبىزدىڭ باستى مىندەتىمىز بولىپ قالا بەرەدى. مەن جولاۋشىلارىمىزعا ولاردىڭ ادالدىعى ءۇشىن، سونداي- اق توتەنشە جاعدايلاردا ۇلكەن جانقيارلىق تانىتقان ارىپتەستەرىمە العىس ايتامىن»، - دەدى Air Astana پرەزيدەنتى پيتەر فوستەر.
Skytrax جىل سايىنعى زەرتتەۋى اۋە جولاۋشىلارىنىڭ قاناعاتتانۋشىلىعىن ولشەۋ ءۇشىن جۇرگىزىلەدى. 2019 -جىلدىڭ قىركۇيەگى مەن 2021 -جىلدىڭ شىلدەسى ارالىعىندا 13 ميلليوننان استام جولاۋشىدان ساۋالناما الىندى. اۋەكومپانيالار قىزمەتىنىڭ ساپاسىن باعالاۋ جەرۇستى جانە بورتتا قىزمەت كورسەتۋدىڭ ءبىرقاتار كريتەرييى بويىنشا جۇرگىزىلدى.
«Air Astana سوڭعى 18 ايدا جالعاسىپ كەلە جاتقان سالاداعى داعدارىسقا قاراماستان، قىزمەت كورسەتۋدىڭ جوعارى ستاندارتتارىن ۇستانۋىنىڭ ارقاسىندا «ورتالىق ازياداعى ۇزدىك اۋەكومپانيا« نوميناتسياسىندا كوشباسشىلىقتى ساقتاپ كەلەدى»، - دەپ اتاپ ءوتتى Skytrax باس ديرەكتورى ەدۆارد پلەيستەد.
