«قاراعاندى - الماتى» تاسجولى قاشان پايدالانۋعا بەرىلەدى؟

نۇر-سۇلتان. قازاقپارات - «قاراعاندى- الماتى» تاسجولىن پايدالانۋعا بەرۋ مەرزىمى بەلگىلى بولدى، دەپ حابارلايدى قازاقپارات ءتىلشىسى.

«قاراعاندى-الماتى» تاسجولىنىڭ ءبىتۋىن جۇرتشىلىق اسىعا كۇتىپ وتىر. سەبەبى اتالعان باعىت ەلىمىزدىڭ سولتۇستىگىمەن وڭتۇستىگىن جالعايتىن ءدالىز. بۇگىندە جول سالۋ جۇمىسى قىزۋ ءجۇرىپ جاتىر.

تاسجولدىڭ جالپى ۇزىندىعى 946 شاقىرىمدى قۇرايدى جانە ول 3 ۋچاسكەدەن تۇرادى.

ءبىرىنشى «قاراعاندى-بالقاش» ونىڭ ۇزىندىعى شامامەن 363 شاقىرىمدى قۇرايدى، ەكىنشى «بالقاش - بۋرىلبايتال» ۋچاسكەسى ول 546 شاقىرىم جانە «بۋرىلبايتال-الماتى» ۋچاسكەسى 67 شاقىرىمدىق جول»، - دەدى ق ر يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ ۇكىمەت ۇيىندە ونلاين وتكەن باسپا ءسوز ءماسليحاتىندا.

ءمينيستردىڭ ايتۋىنشا، اتالعان تاسجول 1- دارەجەلى ساناتقا جاتادى جانە ول 4 جولاقتان تۇرادى.

«جول بويى تولىقتاي ينفراقۇرىلىممەن قامتاماسىز ەتىلەدى. «قاراعاندى-الماتى» تاسجولىن 2023-جىلى پايدالانۋعا بەرۋ جوسپارلانىپ وتىر»، - دەيدى ول.

بۇعان دەيىن حابارلاعانىمىزداي، ۇكىمەت ۇيىندە وتكەن باسپا ءسوز ءماسليحاتىندا ەلدەگى تۇرعىن ءۇي ماسەلەسىن شەشۋدىڭ جاڭا مەحانيزمى قارالىپ جاتقانى ايتىلدى.