قازاقستاندا حالىقتى باسپانامەن قامتۋدىڭ جاڭا مەحانيزمى قارالىپ جاتىر

نۇر-سۇلتان. قازاقپارات - ق ر پرەمەر-ءمينيسترىنىڭ ورىنباسارى رومان سكليار ەلدەگى تۇرعىن ءۇي ماسەلەسىن شەشۋدىڭ جاڭا مەحانيزمى تۋرالى ايتىپ بەردى، دەپ حابارلايدى قازاقپارات ءتىلشىسى.

«بۇگىندە ءتۇرلى ساناتتاعى 500 مىڭنان استام ادام ءۇي كەزەگىندە تۇر. ۇكىمەت تاراپىنان ەلدەگى باسپانا ماسەلەسىن شەشۋ جولىندا جۇمىس بەلسەندى ءجۇرىپ جاتىر. تولەم قابىلەتى تومەن تۇرعىندار دا بار. ولار وتباسى بانكىنىڭ جەڭىلدىكپەن باسپانا الۋ باعدارلاماسىنا قاتىسا الادى. وتكەن جىلى باسپانا سالۋدا رەكوردتىق كورسەتكىشكە قول جەتكىزدىك. ەلىمىز بويىنشا 15 ميلليون شارشى مەتر تۇرعىن ءۇي سالىندى. بۇل دەگەنىمىز - 140 مىڭنان استام ءۇي. ودان بولەك، ساتىپ الۋ قۇقىعىنسىز جالعا بەرىلەتىن 9,5 مىڭ تۇرعىن ءۇي سالىندى. دەگەنمەن، اتالعان كورسەتكىش ازدىق ەتىپ وتىر»، - دەدى رومان سكليار ۇكىمەت ۇيىندە ونلاين وتكەن باسپا ءسوز ءماسليحاتىندا.

ۇكىمەت باسشىسى ورىنباسارىنىڭ مالىمدەۋىنشە، بۇگىندە ەلىمىزدە باسپانالى بولۋدىڭ جاڭا مەحانيزمى قارالىپ جاتىر.

«تاعى ءبىر جايت - باسپانالى بولۋدا ۇكىمەت پەن بانك تاراپىنان جاسالعان جەڭىلدىكتەرگە قاراماستان تولەۋ مۇمكىندىگى از تۇرعىندار ساناتى بار. مەملەكەت باسشىسى اتالعان ساناتتاعى ازاماتتاردىڭ تۇرعىن ءۇي ماسەلەسىن شەشۋ ءۇشىن باسپانانى ساتىپ الۋ قۇقىعىنسىز جالعا بەرۋدىڭ جاڭا مەحانيزمىن ەنگىزۋدى تاپسىردى.

وسى ورايدا ءبىز قۇرىلىس كومپانيالارىنا ءوز اقشاسىنا ءۇي سالىپ، ونى حالىق قالتاسى كوتەرەتىن باعامەن ساتىپ الۋ قۇقىعىنسىز جالعا بەرۋدى ۇسىنىپ وتىرمىز. ياعني، تۇرعىن ءۇيدى مەملەكەت ەمەس، جەكە قۇرىلىس كومپانيالارى تۇرعىزادى جانە وعان جاۋاپتى بولادى. ءبىز تەك سۋبسيديا بەرەمىز»، - دەيدى ول.

ونىڭ سوزىنشە، تۇرعىن ءۇي ساياساتىنا قاتىستى اتالعان جاڭاشىلدىققا يندۋستريا جانە ينفراقۇرىلىمدىق دامۋ مينيسترلىگى جاۋاپتى.