قاسىم امانجولوۆتىڭ سيرەك فوتوسۋرەتتەرى مەن قۇجاتتارى ۇلتتىق مۇراعات قورىن تولىقتىردى

قاراعاندى. قازاقپارات - قاراعاندى وبلىسىنىڭ مەملەكەتتىك ارحيۆىندە اقىن جانە جازۋشى قاسىم امانجولوۆتىڭ جەكە مۇراعات قورى تانىستىرىلدى، دەپ حابارلايدى قازاقپارات ءتىلشىسى.

وندا اقىننىڭ ءومىرى مەن شىعارماشىلىق جولىن كورسەتەتىن 1911-2021-جىلدارداعى 90 عا جۋىق قۇجاتتار، سيرەك كەزدەسەتىن فوتوسۋرەتتەر، سونداي-اق بۇرىن زەرتتەلمەگەن قولجازبالار جيناقتالعان.

ولاردىڭ ءبىر بولىگىن ارحيۆ قورىنا قاسىم امانجولوۆتىڭ قىزى تاپسىردى.

«اقىن، جازۋشى، پۋبليتسيست، جۋرناليست، اۋدارماشى جانە ۇلى وتان سوعىسىنا قاتىسۋشى قاسىم امانجولوۆتىڭ جەكە مۇراعات قورى ونىڭ تۋعانىنا 110 جىل تولۋىنا وراي تانىستىرىلدى. قۇجاتتاردى جيناۋ ءۇشىن ءبىز ق ر ورتالىق مۇراعاتىنا بارىپ، ورال قالاسىنىڭ مۇراعاتىمەن حات جازىستىق. ونىڭ قۇجاتتارىنىڭ، جاريالانىمدارىنىڭ، ولەڭدەرىنىڭ كوشىرمەلەرى جاسالدى. مەن سونداي-اق اقىننىڭ قىزى داريعامەن كەزدەستىم، ول بىزگە ونىڭ قۇجاتتارى مەن فوتوسۋرەتتەرىنىڭ ءتۇپ نۇسقالارىن ساقتاۋعا جانە زەرتتەۋ ماقساتىندا تابىس ەتتى»، - دەدى «قاراعاندى وبلىسىنىڭ مەملەكەتتىك مۇراعاتى» ك م م ديرەكتورى جاڭاگۇل تۇرسىنوۆا.

قۇجاتتار نەگىزىنەن ءتۇپنۇسقالاردا، قولجازبالاردا، باسپا نۇسقالارىندا، گازەت جاريالانىمدارى، سۋرەتتەر، البومدار مەن فوتوسۋرەتتەر تۇرىندە ۇسىنىلعان.

«قاسىم امانجولوۆتىڭ جەكە مۇراعات قورىنىڭ قۇجاتتارى سۇرانىسقا يە بولادى، سەبەبى ول ءومىر سۇرگەن ۋاقىتتى، ونىڭ تاعدىرىن، دۇنيەتانىمىن، سەزىمىن، ەموتسياسىن كورسەتەدى»، - دەپ قوستى جاڭاگۇل تۇرسىنوۆا.

قاسىم امانجولوۆتىڭ 110 جىلدىعىنا وراي قاراعاندى وبلىسىنىڭ مەملەكەتتىك مۇراعاتى اقىننىڭ جەكە مۇراعاتىنىڭ قۇجاتتارىنا عىلىمي-تەحنيكالىق وڭدەۋ جۇرگىزىپ، «ءومىرىن ولەڭمەن ورنەكتەگەن» فوتوقۇجاتتىق كورمە ۇيىمداستىردى، اقىن تۋرالى بەينەروليك ازىرلەدى.