تاشكەنت كينوفەستيۆالىندە قازاقستان كينوسىنىڭ كۇندەرى باستالدى

تاشكەنت. قازاقپارات - تاشكەنت «جىبەك جولىنىڭ ءىنجۋ- مارجانى» حالىقارالىق كينوفەستيۆالىندە قازاق كينوسىنىڭ كۇندەرىن «اناعا اپارار جول» فيلمىمەن اشىلدى، دەپ حابارلايدى قازاقپاراتتىڭ مەنشىكتى ءتىلشىسى.

بۇگىن تاشكەنتتىڭ باستى تەاتر ساحناسى - وزبەكستان ۇلتتىق اكادەميالىق دراما تەاترىندا «قازاق كينوسى كۇندەرىنىڭ» سالتاناتتى اشىلۋى ءوتتى. «قازاقفيلم» ا ق پرەزيدەنتى، كينورەجيسسەر اقان ساتايەۆ ءوزىنىڭ قۇتتىقتاۋ سوزىندە «ۇزاق تاريحى بار تاشكەنت كينوفەستيۆالى اراعا 24 جىل سالىپ قايتا جانداندى. ءبارى تاماشا ءوتتى دەپ ايتا الامىن. كەز كەلگەن كينوفەستيۆال - كينو مەيرامى. ۇزاق ۇزىلىستەن، ءتۇرلى كارانتين شەكتەۋلەرىنەن كەيىن وسىنداي فورۋمدا ارىپتەستەرمەن كەزدەسۋ وتە كەرەمەت. ءبىز كينوفەستيۆال اياسىندا كوپتەگەن مەموراندۋمدار جاسادىق. جەمىستى، ءوزارا ءتيىمدى جانە ناتيجەلى ىنتىماقتاستىقتان ۇمىتتەنەمىز»، - دەدى.

تاشكەنت كينوفەستيۆالى تۋرالى ەستەلىكتەرىن كينو كورسەتىلىمگە كەلگەن قوناقتارىمەن بولىسكەن قازاقستان حالىق ءارتىسى نۇرجۇمان ىقتىمبايەۆ وزبەكستان ۇلتتىق اكادەميالىق دراما تەاترىنىڭ ديرەكتورىنا قازاق كينوسىنىڭ نەگىزىن قالاۋشى شاكەن ايمانوۆتىڭ فيلمدەر توپتاماسىن سىيعا تارتتى.

«مەن مۇندا 30 جىلدان استام ۋاقىت بۇرىن كەلگەن بولاتىنمىن. ول كەزدە «وزبەك فيلم» وتە جوعارى دەڭگەيدە ەدى. سودان كەيىن 90-جىلداردىڭ ورتاسىندا كەلگەنىمدە، كەرىسىنشە، كينويندۋستريا ايانىشتى جاعدايدا بولدى. ءبىز كوپتەگەن وزبەك اكتەرلەرىمەن دوسپىز. كوپشىلىگىن ءوزىم تانيتىنمىن. ارينە مەن بۇل جايتقا قاتتى ۋايىمدادىم. ويتكەنى كينو - ۇلتتىڭ ۆيزيتكالىق كارتاسى. بۇگىن تاعى دا كينوفەستيۆالگە قاتىسىپ، وزبەكستان كينويندۋسترياسىنداعى اۋقىمدى وزگەرىستەرگە قاتتى قۋاندىم»، - دەدى ن. ىقتىمبايەۆ.

ەستەرىڭىزگە سالا كەتەيىك، ءبىر اپتا بويى تاشكەنت، ءاندىجان مەن فەرعانا كينوتەاترلارىندا كورەرمەندەر «اناعا اپارار جول»، «مۇزبالاق»، «كۇلتەگىن»، «امىرە»، « ءبىر سەن ءۇشىن»، «امانات»، «جىلقى ۇرىلارى» جانە «ورالمان» سياقتى قازاقستاندىق فيلمدەردى كورەتىن بولادى.