يسپانيادا جانارتاۋ لاۆاسى مۇحيتقا قۇيىلدى

نۇر-سۇلتان.قازاقپارات - كانار ارالدارىندا اتقىلاپ جاتقان لاۆا مۇحيتقا قۇيىلدى. سۋعا تۇسكەن وتتى جالىننان كەيىن ۇلكەن بۋ پايدا بولدى.

دارىگەرلەردىڭ ايتۋىنشا، اۋاعا تاراعان بولشەكتەر ادام دەنساۋلىعىنا قاۋىپتى بولۋى مۇمكىن. سوندىقتان ماماندار جەرگىلىكتى تۇرعىندارعا ازىرگە دالاعا شىقپاۋعا كەڭەس بەرەدى. مۇحيت تانۋشىلار لاۆانىڭ سۋمەن جاناسۋىنان جارىلىس بولۋ قاۋپى بار دەپ ەسكەرتتى. بۇعان دەيىن لاۆا اتقىلاپ جاتقان پالما ارالىن يسپانيا ۇكىمەتى اپات ايماعى دەپ جاريالاعان بولاتىن.

كۋمبرە- ۆەحا جانارتاۋ 10 كۇن بۇرىن ويانىپ، سودان بەرى ىستىق لاي تاۋ ەتەگىندەگى 600 ءۇيدى، بانان القاپتارى مەن ونداعان نىساندى باسىپ قالدى. 6 مىڭنان استام ادام كوشىرىلگەن.

www.24.kz