پرەزيدەنت كورنەكتى ديپلومات ۆياچەسلاۆ عيززاتوۆتىڭ تۋىستارى مەن جاقىندارىنا كوڭىل ايتتى

نۇر-سۇلتان. قازاقپارات - مەملەكەت باسشىسى قاسىم-جومارت توقايەۆ كورنەكتى ديپلومات ۆياچەسلاۆ عيززاتوۆتىڭ تۋىستارى مەن جاقىندارىنا كوڭىل ايتۋ جەدەلحاتىن جولدادى، دەپ حابارلايدى قازاقپارات.

بۇل جايىندا پرەزيدەنتتىڭ باسپا ءسوز حاتشىسى بەرىك ءۋالي مالىمەت تاراتتى.

«ۆياچەسلاۆ حامەن ۇلى ۇلكەن ومىرلىك جانە كاسىبي جولدان ءوتتى. ول تاۋەلسىز قازاقستاننىڭ سىرتقى ساياساتىنىڭ قالىپتاسۋىنا ەلەۋلى ۇلەس قوستى. ەلىمىزدىڭ مۇددەسىن شەتەلدە ابىرويمەن قورعادى. سىرتقى ىستەر سالاسىندا زور بەدەلگە جانە قۇرمەتكە يە بولعان ۆياچەسلاۆ عيززاتوۆتى جاس ديپلوماتتار ۇلگى تۇتتى. ول ءوزىنىڭ سىڭىرگەن قاجىرلى ەڭبەگىنىڭ ارقاسىندا مەملەكەتتىك ناگرادالارمەن جانە مەدالدارمەن ماراپاتتالدى. ۆياچەسلاۆ حامەن ۇلىنىڭ جارقىن بەينەسى تۋىستارى مەن جاقىندارىنىڭ، دوستارى مەن ارىپتەستەرىنىڭ جادىندا ماڭگى ساقتالادى»، - دەلىنگەن جەدەلحاتتا.